Footer

Baro, napapatay bayat ti pannakidadona iti natayan

SAN JUAN, Ilocos Sur – Sumangsango pay iti blangko a pader dagiti inbestigador mainaig iti pannakapapatay ti maysa a baro iti natayan sadiay Barangay Lira, ditoy nga ili idi rabii ti Pebrero 17 gapu iti kaawan ti lumtuad a saksi iti krimen.

Nupay kasta, kinuna ti kapolisan ditoy nga agtultuloy ti panagkalapda kadagiti impormasion a makatulong iti pannakasolbar iti pammapatay.

Napapatay ni Carlito Alejandro y Riambon, 39, baro, ken residente iti Barangay Nagsupotan bayat ti pannakidadona iti natayan idi agarup 9:15 ti rabii ti nadakamat a petsa.

Nagsagrap met iti sugat iti kannawan a pungupunguanna ni Bobby Francisco Corpuz, Jr. y Viloria, 49, naasawaan, ken residente iti Barangay Resurreccion ditoy met laeng nga ili nga adda iti asideg ni Alejandro iti dayta a kanito.

Naitaray dagiti biktima iti Pira Clinic and Hospital iti Cabugao ngem indeklara ti doktor a nangatendar ken ni Alejandro nga awanen ti biag daytoy.

Nakarekobre dagiti inbestigador iti innem a kapsula manipud iti cal. 45 iti nakapasamakan ti krimen.

Sabali laeng ti nasarakan ti maysa a Roy Torda a kapsula iti asideg ti kanal a nagurayan ti kadua ti pimmaltog ken ni Alejandro ken ti kapsula nga impaima met ni Angel Rafanan y Rafanan, residente iti Barangay Pandayan, a kunana a napidut ti maysa nga ubing iti asideg met laeng ti kanal.

Naipan amin dagiti kapsula ken buli iti crime lab ti Ilocos Sur PPO para iti ballistic examination.

Segun iti inbestigasion, madama a makisugsugal ti biktima iti dado idi immasideg ti suspek sana pinaltogan ti likud ti biktima iti namin-adu a daras.

Maysa a naiwawa a bala ti naitiro iti kannawan a pungu-punguan ni Corpuz.

Kalpasan ti panangpaltogna iti biktima, nagtaray ti suspek a napan naglugan iti agur-uray a nalabaga a motorsiklo a dagus met a pinataray ti kumplotna a nagpaamianan.

Naireport a kinamat dagiti lumugar dagiti suspek ngem nawarada ken saandan nga intuloy idi nagpaputok manen ti suspek sana impukkaw nga “umaykayon”.

Pinatulodan dagiti polis iti flash alarm dagiti kabangibangda a police stations para iti pannakaipakat iti dragnet operation ngem mapapati a nakalusoten dagiti suspek.

Saan pay laeng nga ammo ti motibo ti nasao a pammapatay.#

Comments are closed.