Footer

High tech operation ti natiliw a drug pusher, naibulgar

SAN JUAN, Ilocos Sur – Saanen nga iti kalsada wenno lengleng a lugar ti pakaipakatan ti transaksion iti droga no di babaenen ti selpon, daytoy ti natakuatan dagiti polis iti insayangkatda a panagsukisok iti pagtaengan ti maysa a masuspetsa a drug pusher sadiay Barangay San Isidro ditoy nga ili idi agsapa ti Pebrero 13.

Segun iti report, nakalanad iti inbox ti CP No. 09067252957 a nakumpiska dagiti polis iti ikut ni Rolex Romero y Padua bayat ti panagisayangkatda iti panagsukisok iti balay daytoy ti mensahe a  “5 hundred man insan yurayka ditoy karayan” a naipatulod iti maysa nga agnagan “Fred” idi 21:09:17, Feb 12, 2014.

Maysa ti selpon kadagiti nakumpiska dagiti nagtipon nga elemento ti PAIDSOTG, ISUR PPO ken San Juan Police Station iiti pagtaengan ni Romero idi agarup 6:30 ti bigat ti nadakamat nga aldaw

Nakasamsam pay dagiti otoridad iti dua a babassit a heat sealed plastic sachet a naglaon iti mapapati a shabu, maysa a bassit a plastic sachet a mapapati a naglaon iti shabu residue, ken nalukot nga aluminum foil a naikabil iti uneg dagiti Commando safety matches.

Iti kaudian a damag, naikomitaren ni Romero iti provincial jail, Vigan City kalpasan a naipila ti kaso a panaglabsing iti Section 11 ti RA 9165 maikontra kenkuana ken saan a nakapagpiansa iti   P200,000.00 para iti temporario a pannakawayawayana.

Iti sabali a damag, sumagmamano a sachet a mapapati a naglaon iti droga ken balbala ti nakumpiska dagiti polis iti ikut ti maysa a drug pusher babaen ti buy bust operation nga insayangkatda iti national highway ti Barangay Nanguneg, Narvacan, Ilocos Sur.

Nakumpiska iti ikut ni Gerald Caabay y Calzo ti tallo a heat sealed sachets a naglaon iti mapapati a shabu, sabali laeng ti maysa a heat sealed sachet a mapapati a naglaon iti shabu a ginatang ti polis a nagpammarang a buyer manipud iti suspek, marked money a P1,000.00, maysa a peke a P500.00, ken kuarta iti nadumaduma a denominasion nga agdagup amin iti P2,280.00 ken walo a bala para iti cal. 46.

Nagpuesto dagiti pannakabagi ti linteg iti asideg ti lugar a nakapasamakan ti transaksion ket apaman a naiyawat ti polis a nagpammarang a poseur-buyer ti markado a kuarta, dinagdagusda a ginammatan ti suspek.

Inimbentario dagiti polis dagiti nakumpiska ken ni Caabay iti imatang dagiti barangay officials ti Barangay Nanguneg sada impan ti suspek iti police station para iti umisu a dokumentasion ken disposision.#

 

Comments are closed.