Footer

BANNER NEWS: 3 balay sinukisok dagiti polis; 2 paltog, droga, balbala nakumpiska

VIGAN CITY – Uppat a tattao ti inaresto dagiti polis kalpasan a nagpositibo ti insayangkatda a nagsina a search operations kadagiti pagtaengan dagitoy idi Pebrero 25 ken 26  kas paset ti naing-inget a kampania ti kapolisan maikontra iti maiparparit a droga iti probinsia.

Iti Vigan City, dua a pagtaengan ti sinukisok dagiti dagiti nagtitipon nga elemento ti PDEA ISSET 1 nga indauluan ni Agent Damel Bacate, Vigan City police station nga indauluan ni Police Supt. Maximo Taclas, Ilocos Sur, PAIDSOTG nga indauluan ni Chief Inspector Sosimo Racho ken Ilocos Sur HPG nga indauluan ni Inspector Joseph Yatco babaen ti bileg ti search warrant nga inyisio ni Judge Francisco Ante, Jr. ti MTCC, Vigan City.

Inaresto dagiti polis da April Tuazon Azada, 21, awanan asawa, ken residente iti Barangay Rugsuanan, Vigan City, ken ni Edmar Fetalvero y Tejano, aka Ambo, 34, naasawaan ken residente iti Barangay Capangpangan, Vigan City kalpasan a nakakumpiskada kadagiti masuspetsa a maiparparit a droga, paltog ken nadumaduma a balbala iti pagtaengan dagitoy.

Nakumpiska bayat ti panagsukisok iti balay ni Tuazon ti maysa nga stainless a cal .38, Dan Wesson Arms nga addaan iti Serial No. 38B002247; maysa nga stainless a  Magnum 22, Black Widow; 7 a bala  ti cal .38; 2 a bala ti Magnum 22;  maysa a bala ti cal .22; maysa a heat sealed transparent plastic sachet a naglaon iti mapapati a droga; ken maysa nga stainless a getteng.

Nakakumpiska met dagiti polis iti balay ni Fetalvero iti walo a  bala para iti Cal .38; 6 a bala para iti  Cal .45; 2 bala para iti Cal 9mm; ken maysa a bala para iti  gauge 12; maysa a plastic sachet a nagkarga iti nalabaga a likido; maysa a dakkel a transparent heat sealed plastic sachet a nagkarga iti mapapati a shabu; 5 a babassit a plastic sachet a nagkarga iti mapapati a shabu; 2 nga improvised glass tooter; 3 scissors; 4 lighters; 3 aluminum foil nga addaan iti mapapati a shabu residue; maysa a plastic container a naglaon iti 39 nga awan naggianda a plastic sachets; maysa nga improvised lighter igniter; maysa a rolio ti aluminum foil; 2 nga improvised a plastic tooter; ken maysa a butane set.

Karaman a naaresto ti maysa a Linberg Salvador Palencia, 29, awanan asawa, ken residente iti Barangay 4, San Nicolas, Ilocos Norte a nasalamaan dagiti polis iti uneg ti balay ni Fetalvero.

Sinaksian a mismo dagiti barangay officials, lokal a media ken pannakabagi ti Department of Justice ti panagsukisok dagiti polis iti balay da Tuazon ken Fetalvero.

Naipan dagiti suspek agraman dagiti nakumpiska iti pagtaenganda iti Vigan City police station para iti umisu a disposision.

Kabayatanna, sabali pay a balay ti sinukisok dagiti polis sadiay Barangay Mira, Bantay, Ilocos Sur a nagresulta iti pannakakumpiskada iti paltog ken nadumaduma a balbala idi malem ti Pebrero 26.

Nakakumpiska dagiti nagtitipon nga elemento ti kapolisan manipud iti Provincial Intelligence Branch, Ilocos Sur PPO nga indauluan ni PCI Randolph Baniaga Beniat, ISPPSC, ken Bantay police station nga impanguluan ni COP PSI Andrew Rabang, babaen ti direkta a superbision ni Senior Supt. Nestor Eswagen Felix, OIC, iti balay ni Mario Molina y Palacpac, 55, naasawaan, ken residente iti Barangay Mira, Bantay, iti maysa a Cal. 45 MK IV Series of 90 nga addaan SN 792614, maysa a green pouch a marka “Givenchy” a naglaon iti 5 rounds ti balbala para iti cal. 45, ken maysa nga ammunition box a naglaon iti 13 a kapsula para iti cal. 45.

Segun iti report, sakbay ti implementasion ti search warrant, mapapati a nagresistir da Molina ken ti anakna a ni Michael ket induronda ken ginuyod da Chief Inspector Benia ken Chief Inspector Rabang a nakadunoran ti siko ti naud-udi.

Bayat ti pannakaisurat daytoy, maisagsaganan ti pannakaipila iti maikanatad a kaso maikontra ken ni Molina.#

Comments are closed.