Footer

Drayber ti van, pinaltogan riding in tandem

SANTIAGO, Ilocos Sur – Ginandat dagiti armado a lallaki a naglugan iti motorsiklo a patayen ti maysa a drayber ti van bayat ti panagkargana iti pasahero iti national highway sadiay Barangay Dan-ar ditoy nga ili idi agsapa ti Pebrero 24.

Segun iti police blotter, agdaldaliasat nga agpaamianan ti Hyundai Grace Van a minaneho ni Roberto Angala y Apinir, 36, naasawaan, ken residente iti Barangay Paratong, Sta. Cruz, Ilocos Sur, ngem nagsardeng iti igid ti national highway ti Barangay Dan-ar tapno agkarga iti pasahero ket inasitgan dagiti sumarsaruno a di nabigbig a lallaki a naglugan iti motorsiklo ti van sa pinaltogan ti back rider ti biktima ngem iti side window ti napuntaan.

Nagpaputok manen ti gunman ngem mapapati a nagmintis isu a naaddaan Angala iti gundaway a nangilukat iti ridaw ti van sa dimsaag.

Ngem nagpaputok manen ti gunman a nakapuntaan iti barukong ti biktima.

Naglibas a dagus dagiti suspek iti saan nga ammo a direksion, kuyogda ti paltog a naaramat iti pammaltog.

Awan ti naan-ano a pasahero.

Naitaray ti biktima iti Candon City Hospital para iti pannakataming ti sugatna.

Nangiwayat ti Santiago police iti Oplan Lambat para iti posible a rimmuaran dagiti suspek ken nakikoordinarda kadagiti kabangibang a police stations ngem mapapati a nakalusoten dagitoy.

Saan pay nga ammo ti motibo ti pammaltog.#

Comments are closed.