Footer

EDITORIAL: Bukel a naitukit iti People Power Revolution, nagrusing a kuribated a mula

Saan a sinelebraran ni Presidente Benigno Aquino III ti People Power Revolution iti EDSA kas nakaugalianen a pakaang-angayanna  no di ket nagturong kadagiti luglugar a dinidigra dagiti kalamidad.

Ketdi, iti daytoy nga aldaw, nagbiahe ni Pres. Aquino a nagturong iti Cateel, Davao Oriental, maysa kadagiti lugar nga insualit ni Typhoon Pablo idi 2012, sa iti Bohol a dinuprak ti magnitude 7.2 a ginggined idi Oktubre 2013.

Nagturong pay ni Pres. Aquino iti Bantayan Island, Guiuan Eastern Samar ken Tanauan, Leyte, dua pay a lugar a nakaro a dinadael ni Typhoon Yolanda, ken napanna kinita dagiti proyekto ti DOH sadiay Tacloban.

Naangay met ti “panagsabat” dagiti militar ken dagiti sibilian sadiay Cebu, saan nga iti EDSA kas tradisional a maang-angay iti selebrasion ti People Power Revolution idi 1986.

Maipalagip nga idi Pebrero 25, nagsabat ti vice chief of staff ti AFP idi a ni Fidel V. Ramos ken ni Defense Minister Juan Ponce Enrile, kalpasan nga inkeddengda a pagtiponen ti puersada sada nagturong iti Kampo Crame.

Sakbay daytoy, nagikkat dagiti dua iti puestoda  ken imbabawida ti suportada ken ni Pres. Ferdinand Marcos. Ket iti panagtipon ti puersada, minilion a kailianda ti nagdudupudop iti EDSA a mangsalaknib kadakuada manipud iti puersa ni Pres. Marcos kas panagtungpal iti naipatangatang nga apela ni Cardinal Sin.

Daytoy ti umuna a gundaway a naangay ti  anibersario ti 1986 revolution iti ruar ti nakapasamakanna idi kanika-28 a tawen ti napalabas. Segun ken ni Presidential spokesperson Edwin Lacierda, naselebraran ti rebolusion ti EDSA iti Cebu kas paset ti proyekto ti nasional a gobierno a “pannakimaymaysana” kadagiti tattao nangruna dagiti nagsagana kadagiti nadumaduma a kalamidad.

Mabalin a pudno daytoy ngem panagkitami, adda naun-uneg a gapu no apay a saanen nga iti EDSA a sinelebraran ti gobierno nasional ti People Power revolution a nangiyalimpatok ken ni Cory Aquino a presidente iti pagilian.

Saludsod: naamiris ngatan ni Pres. Aquino nga iti uneg ti 28 a tawen, saan a nagun-od dagiti panagbalbaliw nga inkari ti rebolusion dagiti umili?

Kalpasan ti 28 a tawen, agraira latta dagiti panagkunniber, dagiti panagtakaw iti kuarta dagiti tattao, dagiti pannakailidding ti kalintegan dagiti babassit, dagiti agtultuloy nga ibibileg dagiti babaknang idinto nga ad-adda a pumanglaw dagiti marigrigat.

Nakananama idi ti bukel a naitugkel iti altar ti rebolusion. Ngem sayang ta nagbalin a kuribateg ti rimmusing a mula iti EDSA.#