Footer

Lumugar iti Barangay Poro, pinabakunaanda dagiti asoda

MAGSINGAL, Ilocos Sur – Kalpasan ti pannakatay ti  maysa a kalugaranda gapu iti rabies, boluntario a pinabakunaan dagiti bumarangay ditoy dagiti asoda idinto nga iti kallabes, aleng-alengda a mapabakunaan dagiti tarakenda nga ayup.

Inggannuat ti opisina ti provincial veterinarian ken ti livestock inspector ditoy nga ili ti pannakabakuna amin dagiti aso iti Barangay Poro kalpasan a natay iti ospital ni Derwel Pradas, 31, baro, gapu iti panagramaram ti rabies iti bagina.

Napabakunaan met iti kontra rabies dagiti kabbalay ni Pradas ken dadduma pay nga asideg a kabagianna a nakapulapolna sakbay a naitaray iti Gabriela Silang General Hospital a nakatayanna.

Nakagat iti aso ni Pradas idi Agosto 2013 ket nagpatandok ngem idi Pebrero 20 laeng a nakita dagiti pagilasinan a nagramaramen ti rabies iti bagina gapu iti sabsabali a garawna ken panagbutengna iti danum.

Segun ken ni Marlyn Polca, nangisayangkatda iti panagbakuna iti nasao a barangay idi napan a tawen ngem saan a nabakunaan ti aso a nangkagat ken ni Pradas.

Maysa a Nelson Tabudlo ti akinkukua iti nasao nga aso.

Linagidaw ni Polca ti saan a panangitaltalek dagiti sumagmamano a lumugar iti Poro idi kiniddawda nga ibaudda dagiti asoda tapno mapabakunaan.

Kinuna pay ni Polca nga imbaga dagiti sumagmamano a lumugar a palubosanda laeng a mapabakunaan ti asoda no mismo a dagiti agbakuna ti mangtiliw kadagitoy.

Kinuna ti maysa a pumurok nga impapanda a natay ti aso a nangkagat ken ni Pradas gapu iti pannakabekkelna iti tali a galutna.

Naammuan nga inyadayo ti akinkukua ti aso agsipud ta adda sabsabali a garaw daytoy ngem mapapati a nginetnget daytoy ti talina isu a nakagarut.

Sabali a lumugar ti nagkuna a nakita ni Pradas ti aso a naitalali iti kakaykaywan ket agsipud ta nailasinna nga aso ti kalugaranna, inukarkarna ti tali sana inyawid ti aso.

Mapapati a kinagat ti aso ti saka ni Pradas sa iti ima daytoy idi pakanenna.

Nagpatandok ni Pradas ngem saan a naikkat amin a gita ket daytoy ti nagramaram iti bagina a puon ti nakatayanna.#