Footer

Managparabur ni Ikit Banang

Sarita ni Danilo S. de Guzman

Maudi a paset

 

Napartak ti isasangbay ti napukkawan ket ti met pannakapungkitna iti tayana iti jueteng ti impasungadna. Tinayaanna pay kano iti singkuenta pesos, di ket beinte mil pisos koma met ti bilbilangenna nga inabak. Nagbiddut laeng ket ti panangsumadana kadagiti numero ti naitagtagainepna a nasukalan iti sikapna a baket.

Nasukalan iti sikapna a baket? Kellaat a dimteng manen kaniak ti karkarna a rikna, a kasla adda iparparipiripna a pasamak wenno big event a makunkuna. Diak ammo, ngem masinuok nga adda  italtalukatik ti mugingko, ngem saanko a matarusan.

Nalagipko ti nabasak a libro. No maminsan, gumana kano ti extra sensory perception ti tao ngem no saanna pay a naadal no kasano a basaen dagiti paripirip a sumangbay, saanna a matiliw.

“Hi-hi-hi!” inggarikgik manen ni Nang Masang. “Ti dangngan a bakbaketan!” Inyad-addana ti naggarikgik ket nagmalangakami no ania manen dayta a nakaray-awanna.

“Isupotmo man kadi, ta dimo ket ibulbulsa lattan ‘ta warekwarek!” Nagbungisngis a nakasiput iti panangibulsa ni Nang Filing iti warekwarek. “Ikurkurimedna manen ti mangibulsa, awan met ti dumlaw a mangilasin iti pangramanan met ni Kumpari Saming!”

Dagus nga inyawatan ni Nang Ising iti plastik a supot.

“Dayta a!” binagi met ni Uliteg Sebing.

Sangakammet a dakkel ti insupot ni Nang Filing. Imbagada a nayonanna ngem nagkedked daytoy ta naimis kano met ni Tang Saming, umanayen nga adda pangramananna met.

Nagtultuloy ti ragragsakmi a pumurok. Managparanud ni Ikit Banang isu a naragsakkami a sangapurokan. Nagtultuloy latta ti ragragsak. Agingga a timmadog ti sumipnget.

Adda nagsardeng a traysikel. Ni amang a napan nakimisa ken nakitienda. Nakamisuot a nagturong iti sanguanan ti tiangge.

Bigla a simmangbay manen ti karkarna a marikriknak. Dakesen!

Awan ti makatimek kadakami lalo idi nagunget a dagus ni amang. Pinagungtanna ni Ikit Banang. Agdikar manen ti hayes blad ni amang! Maatakento ket ngata.

“Ania met dayta nga aramidmon, Banang, mangibabainka a talaga! Nagpaw-it gayam ni Loida iti kuarta a para iti pamiliana, inyawat ni Roger nga ahente ti door to door delivery kenka ta impapilitmo nga alaen ngem saanmo metten nga inted iti manugangmo!”

Nalippay amin nga abaga. Adda pay ti mangisubo koma, ngem gapu iti nagngegna, kasla kadagsen iti singkuenta tonelada ti kutsara. Awan ti makatimek, am-ammon dagiti kapurokan no ni amang ti makaunget. Ti rumaman iti saritaan, mairaman a mapagungtan.

“Tinagikuam metten ti kuarta a dimo man la impakaammo! Saandaka met nga im-imutan dagita annakmo ken mamanugangmo no mangibagaka la ketdi a nasayaat kadakuada!”

Awan latta ti makatimek.

“Ala, agtimekka man! Arrabisenka man a bakbaketan! Bimmakbaketanka la a mangibabain, punieta! Dayta ti impulong ni Roger kaniak, ket madanagan payen ta amangan no mapagungtan pay! Pasig la a dinadagmel ti ammom!”

Idi impalawlawko ti panagkitak, ti likudan laengen dagiti babbaket ti makitak. Ni Amang met ngamin, kill joy. Dina la inlugar met ti pammagbagana ken ni Ikit. Dina la maiyuttot a talaga daytoy kakaisuna a pakababalawan iti kababalinna.

“Apay a kasta ti ugalim! Agsaksakripisio dagiti annakmo tapno laeng sumayaat ti biagda a sangapamilia ngem dimo met ida a badangan!”

Nasiputak ti in-inut nga ipapanaw dagiti lallaki a pakairamanan ni Uliteg Sebing.

“Dimonto pay nga ammo a badangan nga agubra iti talon ken bangkagyo ni lakaymo ta dayta met makisugsugal ti ammom! Mangibabainka a talaga, Banang! Adda aya, maitedna a pagsayaatan ti sugal? Pagsiatan a, isu! Isu a minalem nga agpapainumka!”

In-inut a timmakder ni Ikit Banang. Makaliblibbi. Nakadumog ken agin-inayad a kunam la no agturong iti death chamber.

Tumanabutob met ni amang a nangbitbit iti dua a dadakkel a plastik a tienendana.

Tinaliawko ni Nang Ising iti uneg ti tianggena. Agsursurat daytoy iti kuadernona ken nakadumog a kasla awan ti bibiang ti lubong iti inna ar-aramiden.

Tinaliawko ni Olan a nagturong iti paradipad ti tiangge.

“Daytay man plastik a supotmo dita, Nang Ising!”

Pinerrengko ti kataebak.

“Isupotko man laengen daytoy nabatbati a warekwarek ta imbag a pagraranudanda met idiay balay!”

“Wen, a! Nagawid metten dagiti kakaduayo nga agse-session. Adda pay met kagudua a bote, ti linaon ti sammigel, ibusenyon a!” imbalakad ni Nang Filing.

“Ahu! Saanen!” insungbat ni Olan nga agkatkatawa. “Nag-ingel unay a sammigel dayta nga imparanud ni Nang Banang! Amangan no mabangungot pay datao!”

Nagkakatawakami.#