Footer

Gov. Singson, mamayor, dida kayat NTA agaprobar RA 7171 projects

VIGAN CITY – Agmonitor laeng iti produksion ti tabako ti annongen ti National Tobacco Administration, saan a daytoy ti agaprob kadagiti nailista a proyekto dagiti lokal a gobierno iti munisipio man wenno iti probinsia pakaseknan ti RA 7171.

Kinuna ni Gov. Ryan Singson a dina maawatan no apay a kayat ti NTA nga idadauluan ni Administrator Edgardo Zaragoza a daytoy ti agaprobar kadagiti proyekto idinto nga adda met ti sangguniang panlalawigan ken sangguniang bayan a mangannong daytoy kas sagudayen ti RA 7171.

Kinuna ti gobernador a ti annongen ti NTA ket ti laeng mangmonitor iti produksion ti tabako, saan a nakalanad iti RA 7171 nga annongenna ti agaprob kadagiti nailista a proyekto ta adda met ti sangguniang panlalawigan ken ti sangguniang bayan a nakaipabaklayan iti daytoy nga pagannongan.

Itay napan a bulan, rinugian ti National Tobacco Administration (NTA) ti konsultasion kadagiti mannalon ti tabako, traders ken agparpartuat iti sigarilio mainaig iti pannakarepaso ti implementing rules and regulations (IRR) ti Sin Tax Law, partikular ti pannakaaramat ii masingir a buis manipud iti sigarilio.

Immuna nga inangay ti NTA ti konsultasion idi Pebrero 8 iti Bauang, La Union a nakipartisiparan dagiti opisial ken kameng ti National Federation of Tobacco Farmers’ Associations and Cooperatives ket mapapati a  farm-to-market roads, irigasion, subsidy iti produksion ken livelihood program dagiti sumagmamano a naisingasing iti konsultasion.

Naangay idi Pebrero 11 ti konsultasion kadagiti kompania nga aggatgatang kadagiti bulong ti tabako ken agar-aramid iti sigarilio, kas mangibagi met ti pribado a sektor ken idi Pebrero 20 ken 21, nakidialogo ti ahensia kadagiti opisial ti lokal a gobierno kadagiti probinsia ken munisipio.

Ngem linagidaw ni Singson ti mapapati a kaawan ti koordinasion ti NTA iti provincial government nga idauluanna.

Dinakamat ni Singson ti panangawis ti sangguniang panlalawigan ken ni Zaragoza ngem mapapati nga insungbat ti administrador a premature pay ti panagpapatangda ta awan  clearance manipud iti opisina ti presidente.

Nupay kasta, segun iti gobernador, insurat ni Zaragoza a mabalinda ti mapan iti opisinana tapno inpormal a mapagpatanganda dagiti pakaseknan ti implementasion ti IRR.

Kinuna ni Singson a kas sagudayen ti RA 7171, direkta a mairemit ti bingay kadagiti probinsia ket dina maawatan no ania ti panggep ti NTA ta kayatna a daytoy ti agaprob kadagiti proyekto para kadagiti mannalon idinto a napintas ti masursurot a sistema ken adda transparency kadagiti proyekto.

“Maymaysa ti timekmi, saanmi a kayat daytoy nga ar-aramiden ti NTA,” kinuna ni Singson idinto nga inyunay-unayna a no matuloy ti kayat ti nasao nga opisina, mapukaw ti lokal nga autonomia dagiti lokal a gobierno.

Innayon pay ti gobernador nga adda marisna ti politika no apay a kayat ti NTA nga isu ti agaprob kadagiti proyekto iti babaen ti RA 7171 ta “kitkitaendan ti eleksion inton 2016”.

Ti Ilocos Sur ti kadakkelan ti bingay iti excise tax manipud iti RA 7171 ta 70% ti produksion iti tabako ti aggapu ditoy probinsia.

Sagudayen ti RA 7171 a maited ti 15% kas bingay dagiti tobacco producing provinces iti excise tax ti maparpartuat a sigarilio iti pagilian.#

Comments are closed.