Footer

7 tattao, natnag iti buy-bust, search operations

SAN ILDEFONSO, Ilocos Sur – Pito a tattao ti inaresto dagiti polis iti nagsasaganad nga insayangkatda a makalawas a buy-bust operations ken panagsukisok iti balay dagiti masipsiputan nga aglaklako iti droga iti probinsia.

Natnag iti ima dagiti pannakabagi ti linteg da Jorge Avila y Alconis ken Carlo Suero y Dulay iti nagsina a buy bust operations nga insayangkat dagiti polis idi rabii ti Marso 13 sadiay Barangay Sinabaan, Sta. Catalina, Ilocos Sur  ken idi rabii ti Marso 18 sadiay Barangay Baclig, Cabugao.

Kalpasan a nakaawatda iti impormasion manipud iti barangay intelligence networkda nga adda maisayangkat a drug trade iti barangay road ti Sinabaan, Sta. Catalina, imbaon ni PSI Rodel Ularte ti dua nga  intel operatives iti nadakamat a lugar.

Idi agarup 10:40 ti dayta a rabii, simmangpet ni Avila, 41, naasawaan, ken residente iti Barangay Sinabaan, sana inasitgan ti maysa nga agis-istambay.

Dagus nga immasideg dagiti operatiba sada nagpabigbig ngem kellaat nga imbato ni Avila ti iggemna a dua a heat sealed plastic sachet a mapapati a naglaon iti shabu.

Nakakumpiska pay dagiti polis iti kuarta iti ikut ni Avila nga agdagup iti P15,955.00 iti nadumaduma a denominasion.

Nakasukain pay dagiti polis iti maysa a bassit a sachet a naglaon iti residue a mapapati a shabu iti compartment ti motorsiklo ni Avila a Yamaha Sporty.

Natiliw met ni Carlo Suero y Dulay, 36, baro, ken residente iti Barangay Rizal, Cabugao, iti operasion nga insayangkat dagiti polis-Cabugao babaen ti direkta a superbision ni Chief Inspector William Nerona, hepe ti polis, iti periaan sadiay Barangay Baclig a nakagatangan kenkuana ti nagpammarang a poseur-buyer iti maysa a bassit a heat sealed plastic sachet a naglaon iti mapapati a shabu.

Nakakumpiska pay dagiti polis manipud iti ikut ni Suero ti maysa a rolled aluminum foil, marked money a P500.00, P20.00, ken tallo a P5.00 coins.

Naiteden iti opisina ti provincial prosecutor ti kaso a panagsalungasing iti RA 9165 maikontra ken ni Avila.

Kabayatanna, lima a pagtaengan ti nagsasaruno a sinukisok dagiti polis sadiay Magsingal, Sinait ken San Ildefonso a nakasamsamanda kadagiti maiparparit a droga ken drug paraphernalia ken nakaarestaran iti lima a masuspetsa a drug personalities.

Idi Marso 14, sinukisok dagiti nagtitipon nga elemento ti ISPAIDSOTG ken Magsingal Police Station nga indauluan ni  PSI Jaime Navarro Laguesma, OIC, ti balay ni Gerardo Soberano y Tangdet, 39, naasawaan, ken residente iti Barangay Miramar, Magsingal a nakakumpiskaanda iti 5 a heat sealed plastic sachet a naglaon iti mapapati a shabu, assorted drug paraphernalia a pakairamanan ti 4 a nakuppil nga aluminum foil strips, 3 disposable lighters, maysa nga improvised tooter nga addaan iti residue ti napagango a marihuana, ken sumagmamano a plastic sachet.

Napilaanen ni Soberano iti kaso a panaglabsing iti RA 9165.

Kabayatanna, nupay negatibo ti resulta ti panagsukisok dagiti polis idi Marso 16 iti balay ni Lunnel Ilustrisimo y Agdeppa, dakkel a kantidad ti kuarta a mapapati a drug money ti nakumpiskada iti balay ni Ludivico Ilustrisimo y Ilacad, 52, malaksid laeng ti maysa a plastic sachet a naglaon iti mapapati a shabu residue; 2 nga improvised lighter; 2 improvised straw; ken aluminum foil; maysa a selpon ken dua a bateria ti selpon.

Agdagup amin iti P50,125.00 ti nakumpiska dagiti nagsukisok ken ni Ilustrisimo a cash money iti nadumaduma a denominasion.

Naipaima metten iti opisina ti provincial prosecutor ti kaso a panaglabsing iti RA 9165 maikontra ken ni Ilustrisimo.

Kabayatanna, iti search operation nga insayangkat ti PAIDSOTG, PIB, ken ti San Ildefonso Police Station nga indauluan ni PSI Regino Mendoza Geñoso, Jr. idi agsapa ti Marso 20, tallo a tattao a pakairamanan ti agassawa ti inaresto dagiti polis kalpasan a nagpositibo ti resulta ti panagsukisokda.

Iti pannakaisurat daytoy, maisagsaganan ti kaso a panaglabsing iti RA 9165 maikontra kada Edison Retuta y Retuta, 40, naasawaan, ken iti agassawa a nainaganan Silas de Ocampo, Jr. 31, ken Maricel de Ocampo y Ramirez, 33, agpapadada nga agnaed iti Barangay Bahet, San Ildefonso.

Nakakumpiska dagiti polis iti balay ni balay ni Retuta iti maysa a kaha ti posporo a naglaon iti bassit a heat sealed plastic sachet a naglaon iti mapapati a shabu ken sabali pay a plastic sachet a naikabil iti rabaw ti lamisaan, idinto a maysa a pakete ti Marlboro a naglaon iti heat sealed plastic sachet a naglaon iti mapapati a shabu ken disposable lighter ti nasarakan iti  up-upaan a balay dagiti agassawa nga Ocampo.

Sinaksian dagiti barangay officials, kameng ti media ken pannakabagi ti DOJ ti panagsukisok.#