Footer

Agrupsan a bangkay ti lakay, nasarakan

STO. DOMINGO, Ilocos Sur – Agrupsan ti bangkay ti maysa a lakay idi masarakan ti apona iti uneg ti kalapawna idi malem ti Marso 15.

Dagus nga inreport ni Domingo Tabangin, Jr. y Palos, 28, baro, 4th year college student a naduktalanna a bangkayen ti lolona a ni Luis Tabangin y Donato, 79, awanan asawa, mannalon, ken residente iti Barangay Nambaran ditoy nga ili idi makitana daytoy iti uneg ti kalapawna iti kataltalonan.

Iti panagimbestiga dagiti polis, naammuanda manipud kadagiti kakabagian ti natay nga idi Marso 1 daytoy a tawen, nakagat ti lakay iti uleg iti asideg ti kalapawna.

Nupay kasta, naimbagan kano ti lakay.

Ngem inkari ni Tabangin a biroken ken patayenna ti uleg a nangkagat kenkuana ket mamati dagiti kakabagian daytoy a nakagat manen a puon ti ipapatayna.#