Footer

Ania Daytoy Ar-aramiden Dagiti Idolo Dagiti Agtutubo?

Salaysay ni Rilo Bedo

Maudi a paset

 

Kadatayo nga ordinario nga umili, awanantayo met ketdi iti kalintegan a mangibaga no dakes wenno saan dagiti indibidual iti bideo. Matdatayo laeng a masdaaw no ania ti rason nga alaanda pay laeng ti pribado nga aramidda a di mapukaw dayta risgo a mabalin nga ag-leak iti publiko dayta a bideo.

Wen nga agpayso, apay pay laeng ngata nga alaan iti bideo dagiti indibidual dayta nga aramidda?

Adtoy man dagiti sumagmamano a rason a kas kuna dagiti eksperto.

Umuna, adda kano dagiti indibidual nga ad-adda a “mariing” ti riknada no kasta a mabuybuyada ti bagida a mangar-aramid kadaytoy. Kasla isu ti apuy a mangsilmut iti riknada tapno ad-adda pay a gumayebgeb ti essemda iti partnerda.

Maikadua, kayat dagiti indibidual nga addanto pakalaglagipanda. Iti biag, dumteng dayta panagtaeng a di masasaan. Inton dumteng dayta dagiti aramid idi agkabannuag pay laeng ti rikna, narigaten wenno saanen a maannong/maaramid. Ket tapno addanto mangipalagip kadagiti nasasam-it a kanito a naglabasanda, irekordda wenno alaanda ngarud iti pakalaglagipanda dagitoy a pagteng.

Kas met laeng kano iti panagalatayo iti ladawan idi nagpabuniagtayo, nagkasangay, nagkallaysa, nagturpos wenno napadayawan iti tay-ak a sinerrek dayta panangala iti bideo. Ta iti panawen ti panagtaeng, balitokto dagitoy a lagip a subliasublianan.

Maikatlo, mabalin a dagiti indibidual, boringen iti panagriknada ti ar-aramidenda. Kayatda, adda koma kabarbaro a maaramid a mangpadalluyon iti essemda. Ket dayta panangala iti bideo iti aramidenda ti maysa a mabalin a mapanunotda.

Maikapat, pagbalinen daytoy dagiti indibidual a rangtay tapno agsikatda. Tapno mapagsasaritaanda. Kasta ngata dagiti “nalaesen” nga artista?

Ngem diak man maibus a panunoten a dayta ti rason a mapanunotda tapno agsubli manen ti kinaaweng dagiti naganda.

Maudi, mabalin a kunaen dagiti indibidual a normal laeng daytoy a banag. Awan bibiangda no mabuya ti kaaduan ti affair-da. Kasla pay ketdi kano manayonan ti “essemda” no kasta a pagpipiestaan ti umili ti pribado nga aramidda.

Hmm, addada gayam kasta nga indibidual.

Addada pay kaso a limed a maal-ala dagitoy a bideo tapno, iti biang dagiti agnobio, maaramatto a pang-black mail ti lalaki (kaaduanna) iti partnerda tapno saanto a sinaan daytoy . Wenno rangtayna a mangkiddis iti pagbiagna aglalo no adda kunkunaen ti pamilia ti biktima a babai. Aglalo la ngaruden no adda asawa daytoy  a babai.

Kuna ni Dr. Michele Berman, editor ti blog a Celebrity Diagnosis, “as long as the activity is consensual and causes neither party distress or impairment, it’s their business and nobody else’s.”

Nalawag met ngatan. Isu a ditayon pagibusan iti oras dagitoy a paspasamak. Idiantayo a pagpapatangan dagitoy. Napipia nga amang nga italimudoktayo ti imatangtayo iti pagimbagan ti sibubukel a pamiliatayo.

Kadagiti met indibidual nga agar-aramid kadagitoy, siguraduenda latta koman a di agwaras daytoy a pribado nga aramidda babaen iti internet. Tratuenda a nakapatpateg unay dayta a banag a “nakaidalimanekan” ti aramidda. Dida ipalubos a maala ti sabali. Ta isudanto met laeng ti ad-adda pagdas-alan ti madi nga ibungana iti kanito nga ag-leak daytoy.#