Footer

BANNER NEWS: Vigan City ibutostayo a finalist iti New7Wonders Cities!

VIGAN CITY –  Maidagadag kadagiti amin a Filipino, kangrunaanna dagiti amin nga Ilokano, iti panagbutosda tapno mairaman ti Vigan City a kas maysa kadagiti duapulo ket maysa a finalists iti tartaraudin ti global a kampania iti panagpili iti New7Wonders Cities.

Uppat pay a bulan sakbay ti panaggibus ti first finalist phase iti panagbutos, naiparuar dagiti indikasion nga agpeggad ti Vigan City a maalus-os iti listaan dagiti 21 a siudad a mairaman iti sumaruno a phase.

Kanaig daytoy, nagtignay dagiti agtuturay ti Vigan City iti panangidaulo ni Mayor Eva Marie Singson-Medina tapno ilungalongda ti napingpinget pay a kampania tapno mairaman daytoy siudad iti top 21 a siudad nga agabante para iti sumaruno a phase.

Nupay saan a naipakaammo ti ranggo dagiti 28 a pagpilian a siudad, naammuan a dagiti siudad a napigsa kadagiti immun-una a phases a pakaibilangan ti Beirut, Durban, Mumbai, Vigan ken Perth ket addadan iti nababa a puesto ket kasapulan a maikkan iti “dynamism and creative ideas” iti kampaniada para iti panagbubutos, segun iti padamag manipud kadagiti mangimaton.

Adda dagiti siudad a London, Barcelona, Athens, Havana ken Prague iti high level positions ngem kasapulan a taginayonenda ti partakda nga agpasango, kinuna pay ti news release.

Adda met dagiti siudad a Seoul, Mendoza, La Paz ken Quito iti tengnga a puesto ngem saanda nga agkamkammatalek ta mabalin a labsan ida dagiti dadduma, kinuna pay ti news release.

Kinuna ni Eamonn Fitzgerald, Head of Communications for New7Wonders, a kas kapadasanda iti napalabas, “adu ti mapasamak a panagbalbaliw” idinto nga innayonna nga iti udina, “ti pigsa ken creativity ti kampania dagiti tunggal siudad ti mangitunda no ania dagiti mangabak wenno maabak.”

Manipud iti top 28, maipabassit inton Hulio 7 dagiti finalists tapno agbalinto laengen a 21 a siudad ti agabante para iti sumaruno a phase.

Maipabassit manen ti bilang dagiti finalists tapno agbalin laengen a 14 inton Oktubre 7.

Manipud ditoy, mapili dagiti pito a siudad inton Disiembre 7 a pakaipaayan ti pammadayaw a 7NewWonders Cities.

Dagiti sumaganad dagiti 28 nga opisial a finalists (alphabetical order) iti New7Wonders Cities campaign: Athens, Greece; Bangkok, Thailand; Barcelona, Spain; Beirut, Lebanon; Casablanca, Morocco; Chicago, USA; Doha, Qatar; Durban, South Africa; Havana, Cuba; Ho Chi Minh City, Viet Nam; Istanbul, Turkey; Kuala Lumpur, Malaysia; Kyoto, Japan; La Paz, Bolivia; London, United Kingdom; Mendoza, Argentina; Mexico City, Mexico; Mumbai, India; Perth, Australia; Phnom Penh, Cambodia; Prague, the Czech Republic; Quito, Ecuador; Reykjavik, Iceland; St. Petersburg, Russia; Seoul, South Korea; Shenzhen, China; Vancouver, Canada, ken Vigan, Philippines.#

Comments are closed.