Footer

Cabugao, top LGU iti Agri-Pinoy Rice Achievers Awards

CABUGAO, Ilocos Sur – Napadayawan daytoy nga ili a maysa kadagiti  “Outstanding Municipalities and LGU Agri-Extension Workers” iti babaen ti Search for 2013 Agri-Pinoy Rice Achievers Awards iti seremonia a naangay itay nabiit.

Inawat ni Mayor Edgardo S. Cobangbang, Jr. ti nasao a pammadayaw manipud ken ni Department of Agriculture Secretary Proceso J. Alcala National Rice Program Coordinator and acting Undersecretary for Field  Operations Dante S. Delima iti seremonia a naangay iti Resorts World Manila idi Marso 14.

Kas gunggonana gapu iti “positibo ken adu a naitulongna iti pannakaidur-as ti produksion ti pagay iti Region I idi 2013”, immawat ti Cabugao iti project grants nga agdagup iti P1 million.

Napadayawan met da Municipal Agriculturist Zenaida S. Andrada ken ni Municipal Rice Program Coordinator Nereo S. Daproza,  kas Outstanding Agricultural Extension Workers (AEWs) ket immawatda iti sag-P20,000.00 a gunggona.

Inrusat ti DA ti Agri-Pinoy Rice Achievers Awards idi 2011 tapno maguyugoy ti naan-anay a suporta ken partisipasion dagiti Local Government Units (LGUs), Irrigators’ Associations (IAs), Small Water Impounding Systems Associations (SWISAs) ken Agricultural Extension Workers (AEWs) ken tapno mabigbig dagiti gapuanan ken kontribusionda iti pannakaiprioridad dagiti proyekto mainaig iti bagas babaen ti panagaramatda kadagiti dekalidad a bukbukel ken maikanatad a teknolohia tapno magun-od ti rice sufficiency iti 2013.#