Footer

Guardia, natay iti aksidente iti lugan

STA. LUCIA, Ilocos Sur – Natay ti maysa a guardia idinto a nadundunor  ti nagmaneho iti sabali pay a motorsiklo ken ti insakayna idi naikras dagiti luganda sadiay Barangay Burgos ditoy nga ili idi agarup 2:00 ti bigat ti Marso 20.

Naideklara a natayen ni Dominic Ablog y Ramos, 27, naasawaan, security guard iti PMFTC ken residente iti Barangay Mindoro, Vigan City idinto a nasugatan ni Daniel Tolibas y Remigio, 29, naasawaan, computer engineer ti Philip Morris Fortune Tobacco Corporation, ken ti inkalubbonna a ni Bel Carganilla y Gamoa, 32, naasawaan, guardia iti PMFTC, agpada a residente iti Barangay Sidaoen, Sta. Cruz.

Agpada nga agpaabagatan ti Mio motorcycle a minaneho ni Ablog, ken ti Honda Wave a minaneho ni Tolibas ngem iti nagpikuran ti national highway a sakup ti Brgy. Burgos, Sta. Lucia, Ilocos Sur, mapapati a napukawda ti kontrolda iti manibela a puon ti  pannakaidungpar ti luganda iti akinlaud a railings ti kalsada ken nagsagrapanda kadagiti dundunor iti nadumaduma a paset ti bagida.

Mapapati a nakainom dagiti tallo.#

Comments are closed.