Footer

Lugan a nagkarga iti sinaksako a black sand, tinengngel dagiti soldado

SAN VICENTE, Ilocos Sur – Maysa manen a lugan a nagkarga iti sinaksako a black sand a mapapati a maibiahe iti Ilocos Norte ti tinengngel dagiti otoridad sadiay Barangay San Sebastian idi malem ti Marso 17.

Tinengngel dagiti tropa ti 81st Infantry Battalion 7th ID nga indauluan ni Cpl. Jhon Dan Villaflor ti maysa a Mini Forward Canter a nagkarga iti sumurok kumurang 100 a sako ti black sand iti barangay road ti San Sebastian ditoy nga ili idi agarup 2:30 ti malem ti nadakamat a petsa.

Mapapati a maibiahe dagiti sinaksako a blacksand iti maysa a kompania ti minas a nakaadres iti Nueva Era, Ilocos Norte.

Segun iti report, nagresponde dagiti polis ditoy nga ili iti panangidaulo ni Police Inspector Manuel Acosta Viaje, OIC, idi nakaawatda iti tawag ti telepono manipud iti Ilocos Sur Provincial Police Office nga adda maisaysayangkat a mapapati a panagbunag iti black sand sadiay Barangay San Sebastian.

Idi makadanon dagiti polis iti nadakamat a barangay, nadatngandan ti Mini Forward Canter a tinengngel ti grupo dagiti soldado ken lima pay a tattao a pakaibilangan ni Sister Lilian Carranza y Estrañero, OSB, ken director ti Social Action ti Archdiocese ti Nueva Segovia, Vigan City.

Mapapati a naawat met da Cpl. Villaflor ti impormasion mainaig iti maisaysayangkat a panagbunag iti black sand manipud ken ni Fr. Albert Rabe, kura paroko ti San Juan, Ilocos Sur.

Impaima dagiti soldado ti tinengngelda a Mini Forward Canter a nagkarga kadagiti sinaksako a blacksand kadagiti polis nga indauluan ni Viaje para iti umisu a disposision.

Nai-turn-over met dagitoy iti Camp Pres. Elpidio Quirino, ISPPO para iti safekeeping.

Daytoy ti maikadua a gundaway a nalapdan dagiti otoridad ti pannakaibiahe dagiti black sand a mairuar iti probinsia.

Idi Marso 8, siam a tattao ti tinengngel dagiti soldado a mapapati nga agbunag koma iti black sand sadiay Sitio Quinarabangbangan, Barangay San Sebastian.

Ti grupo met laeng dagiti elemento ti Philippine Army nga indauluan ni Cpl Villafor a nakadetalye iti Sitio Namnama, Barangay Tamorong, Sta. Catalina, Ilocos Sur ti nangtengngel kadagiti masuspetsa a mangibiahe kadagiti black sand.

Napinget a konkontraen ti Simbaan ti panagminas iti kabaybayan a sakup dagiti coastal barangays iti probinsia gapu ta daytoy ti mapapati a makagapu iti panagrissuod ti daga iti igid ti baybay ken puon ti pannakalayus dagitoy lugar.

Mismo pay a ni Justice Secretary Leila de Lima ti nangibilin ti panagsardeng iti panagminas iti blacksand iti Ilocos Sur.#

Comments are closed.