Footer

Pannakapnek

Kolum: Pitik

Ni Salvador A. Espejo

 

Tunggal agsabali ti panid ti tawen,  agyamantayo koma iti parabur a nasagraptayo manipud iti Mannakabalin. Mabalin a dakkel ti impaay dagitoy a paraburna iti panagbiagtayo, iti panagbalbaliw ti kasasaadtayo iti gimong wenno iti pannakatun-oy dagiti arapaaptayo a gun-oden para kadagiti ipatpategtayo iti biag.

Iti biangko, naun-uneg ti kaipapanan dagiti impaay ti Namarsua a parabur ken bendision kadakami a sangapamilia itay naglabas a tawen.

Di masbaalan ti panagyamanmi ta uray iti baet dagiti adu a nagkuranganmi a kas kristiano ken karnero ti Mannakabalin a Pastor, intedna kadakami dagiti pamendision, parabur ken grasia tapno sagrapenmi dagiti imbag, balligi ken arapaap saan laeng a para kadakami no di pay dagiti saringitmi iti biag.

Naimnas gayam ti rikna nga umawat iti dimo dawdawaten a sagut manipud iti maysa nga ipatpateg iti biag.

Nasamsam-it gayam ti sagut nga agburayok iti kaunggan ti puso. Uray gayam ingget numo ti maiyawat wenno maitanggaya a sagut no bulanos a nagtaud iti puso, agbalin daytoy a kapatgan a sagut a dimo isukat iti linaklakasa a kinabaknang.

Idi Paskua, nabsogkami iti ayat manipud kadagiti ipatpategmi ditoy lubong.

Iti bukodda a wagas a panangipeksada iti pammategda kadakami, intedda amin a kabaelanda a mangipaay iti nakallalagip a padasmi iti Paskua. Ammomi a dayta ti bukodda a wagas a panagyaman kadagiti sakripisio ken ling-et nga imbaklaymi iti kallabes tapno madanonda ti kasasaadda iti agdama.

Adda kadi pay dawatenmi a dakdakkel a bendision? Kadakami nga agassawa, mapnekkamin kadagiti parabur ken bendision a naisaruag iti biagmi. Tarigagay ken arapaapmi nga agsimpa iti biag dagiti ipatpategmi, ket umdas kadakamin dayta. Dakkel a pagyamananmi iti Namarsua kadagita a bendision ken paraburna.

Kas pagyamanmi, iruknoymi ti maysa nga estoria a namnamaenmi a mangted iti leksion kadagiti sobra unay nga aga-rapaap, kadagiti saan a mapmap-nek iti agdama a kasasaadda iti biag ket kayatda a ngumatngato pay ti tukad ti biagda uray no adda mabaddekanda iti baba. Naragsak a panagbasa…

ADDA idi agtiktiktik iti bato a solo nga agbibiag iti maysa a kalapaw. Nupay nalaing nga agtiktik, nakurapay ken rutroten dagiti kawesna.

Maysa nga aldaw, kabayatan ti panagtiktikna, nangegna ti anabaab ti tallaong a nagtitipon iti igid ti dalan. Babaen ti puk-kawda, naammuanna a bisitaen ti ari ti purokda. Timmipon ti agtiktiktik iti tallaong ket napnuan raem a nangmatmat iti ari a nakakawes iti nalamuyot a seda idinto a kabkablaawan dagiti umili. “No koma adda met kaniak ti bileg ken kinadaeg ti ari,” nakunana iti panunotna.

Nangeg ti langit ti kararagna ket nagbalin a nabileg nga ari, nakasakay iti kabalio ken agwagwagis iti tallaong.

Ngem kabayatan ti kalgaw, napaliiwna no kasano a nagka-limduosan dagiti taona ken pannakasdo dagiti dinguen ken panaglaylay dagiti mula iti nabileg a raya ti init. Timmangad iti langit sana kinuna, “Agbalinak koma nga init.” Pinatgan manen ti langit ti dawatna.

Insaruagna ti nabileg a lawag-na iti daga ket naglemmeng dagiti ari ken prinsesa iti sirok dagiti payongda. Ket kimmap-sut dagiti mannakigubat iti perrengna. Uray dagiti mula kadagiti kataltalonan, nagta-medda kenkuana.

Ngem maysa nga aldaw, inaplagan ti napuskol nga ulep ti ngatuen ti daga ket pinugsatna ti raya ti init. Idi makitana nga adda sabali a nabilbileg, napanunotna, “ka-yatko ti agbalin nga ulep” — nga isu ti nagbalinanna.

Ita, sinallukobanna ti raya ti init ket nariknana ti kinapa-tegna. Nagbalin a higante nga ulep a nangibuang iti tudo iti amin: kaykayo, animal, tattao. Nangriknada amin iti bilegna, malaksid ti dakkel a bato. Isu a dinawatna nga agbalin a bato — nga isu ti napasamak.

Ket awan ti nariknana a pannakatignayna iti init, wenno tudo wenno aniaman nga isangbay ti nakaparsuaan.

Ngem maysa nga aldaw, inasitgan ti maysa a lalaki a nagawit iti bag. Nagsardeng ti lalaki, inruarna ti paet ken martiliona sana rinugian a tiniktikan ti bato. Adtoy gayam ti nabilbileg ngem bato — ket inkararagna nga agbalin a kasta.

Nangeg ti langit ti anek-ekna ket nagbalin manen nga agtiktiktik; nagnaed iti kala-pawna ket ditoy a nagpaet ken nagmartilio — ket napnek iti kasasaadna.#