Footer

Riri iti dado ramut ti pammaltog a nakagudasan tallo a biag?

BANTAY, Ilocos Sur – Kitkitaen dagiti polis no dati a riri iti dado ti ramut ti panangpaltog ti maysa a mannalon kadagiti agkabsat a kalugaranna  sadiay Barangay Balaleng Laudenia ditoy nga ili idi malem ti Marso 18.

Kinuna ni COP Andrew Rabang nga adda naparnuay a di panagkinnaawatan iti nagbaetan da Guillermo Pacpaco y Realin, 39, ken ni Ronald  de Peralta de Peralta, 34, gapu iti dado ket daytoy ti maysa a kitkitaenda a motibo a nanggudasan ni de Peralta ken ni Pacpaco.

Segun iti inisial a panagimbestiga dagiti polis, sibsibugan ni Guillermo dagiti mulana a mais idi mapapati nga immasideg ni de Peralta sana pinaltogan ti biktima.

Nabaelan ni Guillermo ti nagtaray iti balayda ket ditoy ti nakapasaganna.

Immarayat ni Edgar ngem mapapati a nadalananna ti suspek ket pinaltogan ni de Peralta.

Kinuna ni Rabang nga iti panagimbestigada,  limtuad a nagriri da Guillermo ken ni de Peralta iti maysa a daduan ket daytoy ti kitkitaenda a motibo ti pammaltog.

Ngem kinuna ti asawa ni Guillermo nga awan ti ammona a gapu no apay a pinaltogan ni de Peralta ti lakayna.

Kinuna met ti asawa ni Edgar a ni Maribel nga awan ti ammona a nakariri ni lakayna.

Adda dagiti dua a babbai iti Vigan idi naammuanda ti pannakapaltog dagiti asawada.

Awanen ti biag dagiti asawada a nadanonda iti Metro Vigan Cooperative Hospital a nakaitarayanda.

Natay met ni de Peralta kalpasan a pinaltogan ni PO2 Clifford Palacpac y Realin, 27, baro, PNP member a nakadestino iti PNP SAF 2nd Battalion, 25th Company a nakabase sadiay Subic, Zambales.

Iti interbiona ken ni Peter Rebunal a naipatangatang iti DWRS Barangay Commando Brigada a programa ni Jun Ramos, kinuna ni COP Rabang a nangeg ni Palacpac dagiti putok ket immulog iti balayna tapno agusisa.

Nakitana dagiti agkabsat a napasag ken ti suspek a nakaiggem pay laeng iti paltogna.

Nagpabigbig ni Palacpac a maysa a polis idinto nga imbilinna ti panangisuko ni de Peralta iti paltogna.

Ngem mapapati nga impaturong ni de Peralta ti paltogna ken ni Palacpac ket kapilitan a pinaltogan ti polis iti sumagmamano a daras ti suspek a nakagudasanna.

Naitaray dagiti agkabsat ken ni de Peralta iti Metro Vigan Cooperative Hospital ngem naideklarada a dead on arrival.

Simmuko met ni Palacpac kadagiti nagresponde a polis-Bantay agraman ti paltogna a Glock 17 Cal. 9mm.

Narekobre ti SOCO team iti nakapasamakan ti pammaltog ti Cal. 38 a mapapati nga inaramat ni de Peralta a nangpaltog kadagiti agkabsat a Pacpaco, tallo a kapsula manipud iti Cal. 9mm pistol; 2 a kapsula manipud iti Cal. 38; 2 a bala iti cylinder ti Cal. 38; ken maysa a deformed slug ti di pay ammo ti kalibrena a paltog.

Iti autopsia nga insayangkat ni Dra. Lioba Cecilia Tolentino iti bangkay ni Guillermo, nakaala met iti deformed slug ti saan pay nga ammo a kalibre ti paltog.

Naited daytoy iti Bantay police station sa naipatulod iti Provincial Crime Laboratory para iti ballistics examination.

Kinuna ni Rabang a naipaiman ni Palacpac iti Provincial Investigation and Detection Management Branch, Ilocos Sur PPO para iti temporario a pannakaikustodiana ken naipakatanen iti paraffin test iti Provincial Crime Laboratory agraman dagiti  agkabsat a Pacpaco, ken ni de Peralta.#