Footer

Uppat nga aldaw, Tallo a Rabii

Ababa a Nobela ni Salvador A. Espejo

Maikatlo a Paset

 

PINILI ni Randolf ti maikadua a deck ti kayo a pagturogan nga adda iti abay ti tawa. Iti akimbaba a deck ti pili dagiti kakaduana. Sangapulo amin ti maturog iti kuarto. Tallo a mannurat a taga-Ilocos Norte ti nangukopar iti akin-amianan a paset ti kuarto. Nailasin ni Randolf ni Danilo Guzmen, presidente ti Gumil-San Nicolas. Premiado a mannurat ni Danilo. Pada ni Randolf nga umawat iti pammadayaw iti salip ti sarita nga inesponsoran ti Dakilang Ugat.

“Nabayagkayon?” inamad ni Randolf.

“Idi pay la rabii,” insungbat ni Danilo. “Nangarkilakami iti traysikel a nagpakastoy.”

Nagtung-ed ni Randolf idinto nga inlukatna ti nagtagisarming a tawa. Simrek ti nalamiis a pul-oy-bigat nga aggapu iti bakir. Agsisinnublat dagiti pukkaw dagiti dina ammo ti naganna a billit nga agalis-alis kadagiti sanga a liningdan dagiti berde a bulbulong.

Inyaon ni Randolf dagiti aruatenna, inkabilna iti hanger sana inkabil iti kabinet.

Inkeddengna ti agdigos. Adda nabengbengan a pagdigosan iti asideg ti paggiananda. Mabalin ti lima nga aggigiddan nga agdigos.

Panagriknana, nabang-aran ti bagina iti panagbuyatna. Agsagsagawisiw a nagsubli iti kuartoda.

Nakailaden dagiti kakaduana. Agur-urok payen ni Rey.

Immulog met laeng ni Randolf sana sinurot ti desdes nga umuli iti panuroden a paset ti amianan a pasdek. Inaplawan ti makapasalibukag a puyupoy nga aggapu iti kabambantayan iti daya.

Kastoy koma kapresko ti angin iti Vigan, immapay iti panunot ni Randolf.

Nagparang iti isipna ti naggapuanna a siudad – dagiti duog a pagtaengan a naipatakder pay la idi panawen dagiti kastila, dagiti pagmeriendaan iti empanada ken okoy iti aglawlaw ti Plaza Burgos, dagiti panganan a kasla uong nga immadu iti abagatan a laud ti nadaeg a Katedral ni San Pablo ken dagiti maipatpatakder a baro nga otel ken pagtaengan iti uneg ti siudad, tanda ti panaglupos ti Vigan City.

Iti uneg ti nakurang a tallo a tawen manipud panagbalinna a siudad, mariknan ti progreso ti Vigan. Ngem kagiddan ti progreso ti isasangbay dagiti turista ken sangsangaili ken dagiti naasuk ken tumuyutoy a lugan a nangbalbaliw iti daydi naulimek a panagbiag ditoy.

Nangrugi metten a naalian ti ugali dagiti kapatadanna… ken ni Namnama.

Immanges iti nauneg ni Randolf idi umassibay iti panunotna ti babai nga iti unos ti mano a tawen, tinagtagibina ken inar-arapaapna nga isaklangnanto iti altar.

Ngem anian ta….

Immanges manen ni Randolf iti nauneg idinto a winagwagna ti ulona tapno maiwagsakna dagiti nadagem a buya iti napalabas. Adayon ti kalman, nakunana. Masapul nga umaddang, mangabaruanan manen.

Dina napupuotan a nakagteng gayamen iti tapaw ket agsalogen ti dana a sursurotenna.

Nagmattider ket impalawlawna ti panagkitana. Iti daya, kasla perlas a kumilapkilap ti agar-arasaas a karayan a sumilapsilap iti nagbabaetan dagiti pinuon dagiti kayo iti panangdayas ti ubing nga init.

Timmaliaw ni Randolf iti likudanna idinto a kinitana ti oras iti pungupunguanna. Alas siete pay laeng. Masinunuona a di pay bimmangon dagiti kakaduana ken di pay naisagana ti pammigatda. Mangaw-awis ti karayan ket inkeddengna ti panagpagnapagnana a mangsurot iti karayan nga agturong kadagiti nasinggit a garakgak nga iyeg-ipanaw ti pul-oy.

Idi makadanon iti igid ti karayan, nadarimusmosanna dagiti ubbing nga agdigdigos iti pangaldemen a paset.  Iti saan nga adayo iti amianan, nataratar dagiti bangka nga agur-uray kadagiti pasahero nga iballasiwda iti karayan. Damagna nga adda dagiti purok iti abagatan a paset ti resort ket ti bangka ti pagluganan dagiti residente nga aggawid.

Sabali laeng dagiti bangka nga agitulod kadagiti turista a mapan iti kueba ti Callao. Kas naammuanna, maysa kadagiti daydaywen dagiti sangsangaili ti Callao Caves a pakasarakan kadagiti stalactites ken stalagmites. Kinapudnona, dayta ti napagtitinonganda nga agkakadua a serken bayat ti kaaddada iti kumbension. Maysa pay a planoda a pasiaren ni Apo Baket ti Piat.

Nagtugaw ni Randolf iti nagrungarong a bato a sumango iti karayan ket impalawlawna ti panagkitana. Ditoy, mariknana ti kinaasidegna iti Namarsua, umuk-ukuop iti panunotna nga adda Mannakabalin nga Ima a nangmuli kadagitoy a buya ken biag.

“A penny for your thoughts?” nasinga ti panagpampanunotna iti timek-babai iti sikiganna.

Tinaliaw ni Randolf ti naggapuan ti timek. Dina naaluadan ti matana a nangpalabas iti pakabuklan ti babai: ti gimmitara a pammagi nga ad-adda a pinagminar ti nakipet a pantalon a maong, ti nabaknang a barukong nga agpilit a rumkuas iti puraw a tisirt, ti asul ken kasla manulsulisog a mata ken ti naingpis ken agar-arimasa a bibig a pagtamtamdan iti nasam-it nga isem. Ti ganggannaet a babai a kadua ni Manang Pacing Arenas.

“Nakaisturboak sa metten?” kinuna ti babai idinto a nagtugaw iti abay ni Randolf. Iti apagdarikmat, simmuknor iti agong ni Randolf ti apagapaman nga ayamuom ti buok ti babai nga inyaplaw ti pul-oy.

“Makasaoka iti Iluko?” di nailinged ni Randolf ti siddaawna iti di man la panagannawil ti babai nga agiluko.

“Of course, inadalko,” nagkatawa ti babai. “By the way, I’m Margret Anderson, manipud iti Amsterdam, the Netherlands,” intanggayana ti imana.

“Randolf… Randolf Garcia,” kinuna ti baro idinto nga inallawatna ti nakatanggaya a dakulap ni Margret. “Taga-Vigan City, Ilocos Sur.”

Ti agar-arimasa a bibig ti balasang ti nakaipigketan dagiti matana.

(Maituloyto)