Footer

3 nagtakaw iti kalding, natiliw iti hot pursuit operation

SAN JUAN, Ilocos Sur – Patien dagiti polis  a natukkolen ti duri ti grupo nga agtaktakaw iti kalding kadagiti barangay ditoy kalpasan ti pannakatiliw dagiti tallo a suspek sadiay Barangay Lapting idi Marso 23.

Iti follow-up operation nga insayangkat dagiti polis, natiliwda da Alexander Villon y Aquinde, 26, naasawaan, residente iti Brgy. Lapting; Niño Torda y Vita, 18, out of school youth, resident iti Brgy. Surngit; ken Jayson Dulay y Vivit, 19, baro,  ken residente iti Brgy. Solotsolot, San Juan, Ilocos Sur.

Dagiti tallo ti naitimbre a nangtakaw iti kalding ni Solotsolot Barangay Captain Elly Javier y Padua, 49, naasawaan, idi rabii ti Marso 15.

Segun ken ni Padua, inwaywayna dagiti kaldingna a pasig a kabayan iti amiananen ti Solotsolot National School ngem idi mapanna kitaen dagitoy iti kabigatanna, awandan iti nakaiwaywayanda.

Sinapul ni Padua dagiti kaldingna ngem saannan a nasarakan dagitoy isu nga inreportna ti napasamak iti police station.

Nagtignay dagiti polis ket babaen ti tulong ti impasdekda a barangay intelligence network, naitimbre kadakuada nga adda dagiti kalding iti ikut ti  maysa a Jeffrey Atalin y Villon, 46, naasawaan, ken residente iti Barangay Lapting, San Juan.

Napan dagiti polis agraman ti biktima iti impatuldo ti BIN a nakaipanan dagiti kalding ket positibo a nabigbig ni Padua dagiti kaldingna.

Iti panagpalutpot dagiti polis ken ni Jeffrey Atalin y Villon, kinuna daytoy a ginatangna dagiti kalding ken ni Alexander Aquinde.

Nangisayangkat dagiti polis iti pursuit operation a nagtungpal iti pannakatiliw ni Aquindo ken  dagiti sabali pay a kaduada a pakairamanan da Niño Torda ken Jayson Dulay.

Kinuna ni Barangay Captain Padua nga idarumna dagiti suspek tapno adda pagnemmanemmaanda. Kasta met a kinuna dagiti dadduma a bumarangay a napukawan iti kalding iti napalabas nga idarumda met dagiti suspek.#

Comments are closed.