Footer

Addan lead iti Arogante shooting: polis-Cabugao

CABUGAO, Ilocos Sur – Adda dua a lead a sursuroten dagiti inbestigador mainaig iti pammaltog iti Barangay Rizal  ditoy nga ili idi rabii ti Marso 24 a nakatayan ti maysa a tricycle driver ken pannakadunor ti inliabarna a kabsatna.

Segun ken ni COP William Nerona, sumagmamano a tattao ti inawis ti kapolisan ditoy tapno beripikarenda ti mapapati a sabali pay a motibo ti pammapatay.

Nupay kasta, saan pay nga impalgak ni Nerona no ania ti nasao a motibo tapno saan a maunaan ti panagimbestigada.

Kinunana a kitkitaenda pay ti anggulo no adda pakainaigan ti mapapati a kinariri ni Arrogante iti pammaltog.

Maipalagip nga idi agarup 7:45 ti rabii ti nadakamat a petsa, pinaltogan dagiti nagkalubbon a lallaki ni Amir Rex Arrogante y Mangrubang, 32, naasawaan, tricycle driver, ken residente iti Barangay Margaay, Cabugao bayat ti panagdaliasat ti Kawasaki Bajaj tricycle a minanehona iti national highway a sakup ti Barangay Rizal.

Segun iti inisial a panagimbestiga dagiti polis, naggapu dagiti agkabsat iti tiendaan publiko ti Cabugao ket iti sango ti Shell Gasoline Station, nagmenor ni Tabigne tapno sumrekdan iti balayda idi kellaat nga immabay ti nalabaga a Honda XRM a motorsiklo a nagluganan dagiti nagtagihelmet ken nagaruat iti diaket a suspek ket maysa kadagitoy ti nangpaltog iti biktima iti sumagmamano a daras.

Nairaman a tinamaan ti bala ti makannigid a luppo ni Analyn Arrogante y Mangrubang, 21, midwife, residente met laeng iti Barangay Margaay a nagsakay iti likudan ni Amir.

Immuna a naitaray dagiti biktima iti Suero General Hospital ngem naiyalis ni Amir iti Metro Vigan Cooperative Hospital, Bantay a nakaideklaraanna a dead on arrival.

Nagsagrap ni Amir iti patal a sugat iti baba ti kilikilina ken iti boksitna.

Iti kaudian a report, natalgeden ti kasasaad ni Analyn kalpasan ti operasion.

Naglibas dagiti di nabigbig a suspek iti amianan a direksion.

Nangisayangkat dagiti polis iti manhunt operation ken nangipatulodda iti flash alarm kadagiti kabangibangda a police stations ngem negatibo ti resultana.

Nakarekobre dagiti inbestigador iti tallo a kapsula a nagtaud iti Cal. 45 pistol iti crime scene.

Kinuna ni Nerona nga apaman a sumayaat ti kasasaad ti balasang, mangipakitada kenkuana kadagiti ladawan bareng adda pakabigbigan kadagiti suspek a nangisayangkat iti pammaltog.

Nupay kasta, saan nga impalgak ni  Nerona ti nagan ti kinariri ti biktima tapno di maunaan ti panagimbestigada.#