Footer

Anak, binagsolna ti amana, kabsatna

MAGSINGAL, Ilocos Sur – Binagsol ti maysa nga anak ti amana ken kabsatna gapu iti dida panagkikinnaawatan a pinarubrob ti pannakabartekda iti arak sadiay Barangay Puro, ditoy nga ili idi rabii ti Marso 23.

Segun iti police blotter, sakbay ti pammagsol, aggiinom dagiti agama a Nemesio Tabigne y Torricer, 40,  ken Marcelino Tabigne y Borigsay, 27, iti balayda idinto nga aggiinom met da Jimmy Tabigne y Borigsay, 33, ken kakaduana iti kaarruba a balay ti maysa a Danny.

Mapapati a naariwawa ti grupo da Jimmy ket napan inanawa ida ni Nemesio, banag a nakapabainan ni Jimmy ket napagsawanna iti dakes ti amana a nagtungpal iti panangmalo ni Marcelino ken ni Jimmy iti monoblock chair ken iti panangbagsol ti naud-udi ken ni Marcelino ken ti amana.

Nakarekobre dagiti polis ti maysa a kitchen knife nga agatiddog iti sumurok kumurang 8 a pulgada karaman ti pagiggaman.

Agsipud ta awan pay ti darum, temporario a nawayawayaan ni Jimmy ket naikustodia iti barangay captain.

Agpapaimbag met da Nemesio ken Marcelino iti Gabriela Silang General Hospital.#