Footer

Balay ti balo, natakawan

CANDON CITY – Alahas ken selpon ti natakaw iti balay ti maysa a balo sadiay Barangay Oaig Daya idi parbangon ti Marso 27.

Inreport ni Florentina Villegas y Tejada, 64, iti polis a naduktalanna a sinerrek ti mannanakaw ti balayna idi sumangpet manipud iti Candon Civic Center a nagbuyaanna iti Senior Citizen’s Night ket natakaw dagiti nadumaduma nga alahasna nga agbalor amin iti P1,785,000.00 ken I-Phone4 nga agpateg iti P3,000.00.

Naammuan iti panagimbestiga dagiti polis a dinadael ti mannanakaw ti secondary lock ti likud a ridaw, pinorsarna a linuktan ti sliding door iti dining room sana sinerrek ti kuarto ti biktima a nangkasakasanna kadagiti alahas ken selpon.

Agmaymaysa ti baket iti balayna.

Iti pannakaisurat daytoy, di pay ammo ti kinasiasino ti mannanakaw.#