Footer

Nakasaksak nga alikamen, kitkitaen ti BFP nagtaudan apuy a nanguram iti Verzosa ancestral house.

VIGAN CITY – Naliwayan a nakasaksak nga alikamen ti kitkitaen dagiti bumbero a nagtaudan ti apuy a nanguram iti maysa nga ancestral house ditoy siudad idi malem ti Marso 25.

Kinuna ni Vigan City BFP  investigator Leopoldo Ayunon bayat ti interbio ni Peter Rebunal kenkuana a  naipatangatang iti Barangay Commando Brigada a programa ni Jun Ramos,  nakarekobreda iti multiple feeding ti electrical wiring iti kuarto a mapapati a naggapuan ti uram.

Iti panangilawlawag ni Ayunon, mabalin a napasamak ti short circuit a puon ti panag-spark dagiti wiring ket agsipud ta nai-mount ti plug iti plywood, pimmudot daytoy ket immapuy  a nagtungpal iti panagkayamkam ti uram.

Segun ken ni Ayunon,  ti nakitada a saksakan ket saan nga appropriate para kadagiti klase ti electrucal appliances nga adda iti nauram a kuarto.

Iti inisial nga inbestigasion, mapapati a nangrugi ti uram iti umuna a kadsaaran, iti kuarto nga up-upaan dagiti agassawa a nainaganan Ricardo de la Cruz ken Maricel ket nagramaram kadagiti kaabayna a kuarto a nadibisionan iti kayo.

Mapapati a nagtaud ti uram iti naliwayan a nakasaksak nga electric fan ken heater.

Ngem pinaglibakan ni dela Cruz a naliwayanda nga inikkat ti plug dagiti alikamenda idi pimmanawda a napan naglako iti balloon ken ay-ayam iti sango ti Jolibee iti Plaza Salcedo idi alas tres dayta a malem.

Kinunana a malaksid ti bentilador ken water heater, awanen ti alikamenda a maisaksak iti koriente.

Kinunana a dua lawas metten a nadadael ti heater ket saandan nga us-usaren pay.

Ngem segun iti sabali pay a boarder, maysa a masikog, nakitana ti apuy iti uneg ti kuarto da de la Cruz.

Innayon ti  lima a bulan ti sikogna nga agkaskasera a dinagdagusna a binagkat ti maysa ti tawenna nga anakna ket dagusda a rimmuar iti kaserada agsipud ta dakkelen ti apuy.

Kinuna met ni Patricia, asawa ni Robert Verzosa, administador iti ancestral house, nakitana ti apuy manipud iti kuarto dagiti agassawa a dela Cruz.

Kinuna a naglagaw idi makitana nga agkayamkamen ti apuy numona ta adda iti maikadua a kadsaaran dagiti annakna.

Nupay kasta, nakababa dagiti annakna nga awan ti nakaan-annuanda.

Nupay nadepdep met laeng dagiti bumbero ti uram, totally gutted ti balay isu nga inyalis pay laeng dagiti agassawa a Verzosa dagiti agkaskasera kadakuada iti sabali a balayda iti Barangay III.

Segun ken ni Dela Cruz, nauram amin a gamitda agraman dagiti lakoda a toys ket problemana ita ti pangalaanna iti pagbiagda.#