Footer

2 grupo, nagriri iti inuman; 2 paltog nakumpiska dagiti polis

CANDON CITY – Dua a grupo dagiti lallaki ti nagriri bayat ti panaginumda iti maysa a balay a puon ti panagpaputok ti maysa kadagiti nainbolbar iti riribuk.

Segun iti report, boluntario nga insuko ni Jon-Jon Gabayan y Disu, 34, naasawaan, OFW ken residente iti Barangay Paras, Candon City, kadagiti nagresponde a polis ti maysa a Glock 17 Gen 4 Austria cal 9MM ken addaan iti magasin a nagkarga iti 6 a bala a mapapati nga imputokna iti kangitingitan ti komosion a pinarnuay ti saanda a panagkinnaawatan iti sabali a grupo.

Sabali pay ti M-16 rifle a nagmarka iti Colt AR-15 nga addaan SN 241298 nga addaan iti long magazine a nagkarga iti 22 a bala ti inruarna manipud iti Mitsubishi Montero.

Iti panagimbestiga dagiti polis, adda saan a nagkinnaawatan ti grupo ti suspek kem maysa a Ronaldo a.k.a. “F4” ket napasamak ti komosion agingga iti adda nagkanalbuong.

Nakasarak dagiti inbestigador iti maysa a kapsula ti 9MM iti nakapasamakan ti riribuk.

Naipan ti suspek agraman dagiti paltogna iti police station para iti maikanatad a disposision.#

Comments are closed.