Footer

2 menor de edad, natay iti aksidente iti lugan

SANTA, Ilocos Sur –  Dua a menor de edad ti natay idi nakidinnungpar ti motorsikloda iti maysa a public utility vehicle iti national highway a sakup ti Barangay Taleb ditoy nga ili idi malem ti Marso 28.

Naipadamag a natay iti aksidente iti Bantay ni Guiller Barbosa y Donato, 14, ken ti inlubbonna a ni Raymark Bisarra y Rosario, 15.

Segun iti police blotter, agpalaud a direksion ti Honda Wave motorcycle a minaneho ni Barbosa, residente iti Zone 1, Taleb, Bantay, ket mapapati nga inobertekanna ti maysa a van a nakaparada iti abaga ti kalsada ngem kimmaut iti linia ti PUV Kia Pregio a minaneho ni Edwin Pespes y Robillon, 33, naasawaan, ken residente iti Brgy. Boquig, Bantay, Ilocos Sur, nga iti dayta a kanito ket agpadaya.

Mapapati a nagpreno ni  Pespes tapno saanda nga agdinnungpar ngem napasamak latta ti pannungpar ket kas resulta, nagsagrap iti nakaro a dundunor da Barbosa ken ti insakayna a ni Raymark Bisarra y Rosario, 15, ken residente met laeng iti Zone 1, Taleb, Bantay.

Naitaray dagiti dua iti Metro Vigan Cooperative Hospital ngem naideklarada nga awanen ti biagda. Awan ti helmet dagiti dua idi napasamak ti aksidente.

Naipan met ti drayber ti PUV iti Gabriela Silang General tapno maagasan sa naipan iti Bantay Police Station para iti maikanatad a disposision.

Iti kaudian a damag, naisaklangen ni Pespes iti kaso a reckless imprudence resulting to double homicide and damage to property.

Kabayatanna, idi agarup 9:20 ti rabii ti Marso 29, dinungpar ti Honda Dazz a minaneho ni Melvin Villasillo y Tabil, 20, ti maysa a nakaparking nga owner type jeep iti makannawan nga abaga ti national highway a sakup ti Barangay Baclig, Cabugao, Ilocos Sur.

Gapu iti pigsa ti pannungpar, nagsagrap ni Villasillo kadagiti dunor iti nadumaduma a paset ti bagina ken iti makannawan a sakana ket naitaray iti Suero General Hospital sa naiyalis iti Gabriela Silang General Hospital, Vigan City a nakaideklaraanna a dead on arrival.

Naiyospital met ti insakayna a kabsatna a ni Ranny Villasillo y Tabil, 5 gapu ta agalenna ti ulona ken nasakit ti makannawan a takiagna.#

 

Comments are closed.