Footer

Buis… Buis… Buis…

Kolum : Sinursuran

Ni Jobert M. Pacnis

(Maudi a paset)

 

Ita, saan laengen a dagiti adda itoy a sektor ti biktima. Dagiti payen mismo a propesional! Nalawag kano ti ipasimudaag ti ads ti BIR: ibabainna dagiti mangngagas iti kabassit laeng ti baybayadanda a buis.

Wen, pudno, rebbengna laeng nga agbayad ti asino man kadatayo iti maitutop a buis. Dagiti aglabsing, masapul nga agsungbat iti linteg.

Ngem umanay kadi daytan tapno ibabain iti publiko ti maysa nga ahensia ti sibubukel a grupo dagiti propesional?

Itoy nga ads ti BIR, saan kadi a nagbayad iti riniwriw a gatad kadagiti estasion ti TV, radio ken iti print media? Naggapuan daytoy nga imbayadna?

Iti buis dagiti umili, sadino pay koma?

Baliktad a balinsuek, manen?

Ti argumento ti BIR, apay nga agreklamo dagitoy a propesional? No pudno nga agbaybayadda iti umisu a buis, awan ti rason a masaktanda iti nasao nga ads.

Aniat’ panagkunam, ka-Sinursuran?

Saan nga iti panangala iti grupo dagitoy a mangngagas. Ngem dakkel a panagabuso daytoy nga inaramid ti BIR. Husto (technically legal) daytoy nga ads ti nasao nga ahensia ngem no makasair iti rikna, liable latta met.

Wen, pudno, trabaho ken/wenno responsibilidad ti nasao nga ahensia ti agsingir iti umno a buis kadatayo nga umili ngem saanda a kalintegan nga aramiden daytoy iti wagas a pakadadaelan iti kredibilidad wenno kinataotayo.

No kitaentayo ti Artikulo 26 iti Civil Code, nalawag a nakailanad dita ti panangrespeto iti dignidad, kinatao ti padana a parsua. Saan a dadaelen. Ket saan a mailaksid ditoy dagiti opisial ti gobierno.

No one is above the law, kunada man.

Itoy a napasamak, mapagam-amkan ti itatayok ti bilang dagiti mangngagas a mapan laengen agsapul iti narabraber a pagaraban iti sabali a pagilian.

Ta di ket maibabainda iti mismo a pagilianda!

Brain drain latta ti nalawag nga ibungana. Makurangantayo latta kadagiti propesional a mangtaming iti salun-at ti tumunggal maysa kadatayo. Aglalo ket rumikrikut ti kasasaad ti bagi iti nagkaadu itan a pakaalaan iti sagubanit (iti man taraon a kontaminado wenno panagbaliw iti taray ti panawen—stress a di masasaan).

Sapay la koma ngarud ta maurnos daytoy nga isyo iti kasapaan a panawen. Saanen nga urayen pay a rumaba. Ta iti udina, datayo met laeng nga umili ti agsagrap iti madi nga ibungana.

Iti biang ti ahensia ti gobierno, isardengnan dayta libelous nga ads-na ket agkiddaw iti pammakawan kadagiti nadalapus. Iti met biang ti PMA, masapul a dalusanna ti rekord dagiti kamengna tapno awanto dayta pakasarsaritaanda a  di agit-ited iti resibo kadagiti pasienteda.

Dakkel unay ti panagkasapulan ti gobierno ita iti pondo kas pangsupusopna iti kasapulan ti pagilian, kangrunaan dagiti umili. Masapul ti naiget a panagsingir iti buis tapno mapaadda dayta a kasapulan. Ngem rumbeng a mabalanse ti amin.

Kas met ordinario nga umili, saantayo koman nga agbalin pay a babantot iti asino man. Bayadantayo ti umisu a buistayo.

Ta agsubli met la dagitoy a kas serbisio kadatayo.

Tulongantayo ti pagiliantayo. #

Comments are closed.