Footer

Buy-bust, search operations insayangkat kapolisan

VIGAN CITY – Positibo ti panagsukisok dagiti polis iti balay ti dua a drug personality sadiay Barangay 4 ditoy siudad  idi malem ti Marso 29.

Sinukisok dagiti nagtitipon nga elemento ti Vigan City Police Station nga indauluan ni PSupt. Maximo A. Taclas; PDEA ISSET 1 nga indauluan ni Agent Damel Bacate; ISPAIDSOTG nga indauluan ni  PCI Sosimo R. Racho iti balay ken paraangan ni Virgilio Camacho y Arenas, 67, naasawaan, ken ni Violeta Camacho y Fontejon, 33, awanan asawa, agpada a residente iti Barangay 1V, Vigan City.

Sabali pay ti buy-bust operation nga insayangkat dagiti polis maikontra ken ni Wilken Tabangay y Camacho, 22, baro, ken residente iti Gen. Luna St., Barangay IV, Vigan City, Ilocos Sur.

Nakakumpiska dagiti polis iti nasao nga operasion iti maysa a granada, glass tooter nga addaan iti residue, 5 a babassit a heat sealed transparent plastic sachets a naglaon iti mapapati a shabu, 4 getteng, maysa a disposable lighter, 4 babassit a transparent sachet nga addaan iti residue a naikabil iti bassit a plastic zipped lock, 8 a crumpled foil nga addaan residue a naikabil iti plastic nga addaan iti zipped lock, ken maysa nga improvised tooter,

Nakumpiska met dagiti polis ti  2 a sag-P500.00 a naaramat a marked money ken maysa nga small heat sealed transparent plastic sachet a naglaon iti mapapati a shabu iti buy bust operation.

Imet dagiti polis ti search warrant nga inyisio ni Judge Francisco Ante, Jr. ti MTCC, Vigan City ken ti PDEA RO1-0314-00085 idi sinukisokda ti balay dagiti ag-Camacho ken ti   PDEA ROA1-1314-00084 idi insayangkatda ti buy-bust operation maikontra ken ni Tabangay.#

Sinaksian dagiti barangay officials, lokal a kameng ti media ken pannakabagi ti DOJ ti panagsukisok iti pagtaengan dagiti ag-Camacho.

Nakasuan iti panaglabsing iti Section 5 ti RA 9165 ni Wilken Vaniber Tabangay Camacho babaen ti inquest proceeding iti Opisina ti City Prosecutor a nai-docket iti babaen ti NPS No. I-14-INQ-14C-00014.

Napilaan met iti kaso a panaglabsing iti Section 11, Section 15 ti RA 9165 ken RA 10591 maikontra kada Violeta Fontejon Camacho ken Virgilio Camacho y Arenas ket naipaiman ti inquest proceeding iti Opisina ti City Prosecutor, Vigan City iti babaen ti NPS Docket No. I-14-INQ-14C-00015.#

 

Comments are closed.