Footer

Shooting incidents iti probinsia, imbilin ti PD a matutokan

VIGAN CITY – Imbilin ni Ilocos Sur Provincial Director Senior Supt. Nestor Felix ti panangtutok dagiti inbestigador kadagiti pammapatay a naisayangkat iti probinsia para iti madagdagus a pannakasolbar dagitoy.

Kanaig daytoy, impatalged ni Felix nga ar-aramiden ti kapolisan ti kabaelanda a mangsolbar kadagiti pammapatay iti sanguanan ti panagraira dagiti loose firearms ken illegal a droga iti probinsia iti baet ti imminget a search operations nga insayangkatda a nakumpiskaan kadagiti paltog ken nakaarestuan dagiti agikut.

Maipalagip  nga idi agarup 8:40 ti sardam ti Marso 28, pinaltogan dagiti armado a lallaki a nagkalubbon iti motorsiklo ni Nalvo Barangay Captain Melchor Alcantara y Sembrano, 51, naasawaan, bayat ti panagdaliasat ti luganna nga Adventure iti national highway a sakup ti Barangay San Antonio, Narvacan, Ilocos Sur.

Segun iti report, bayat ti panagtaray ti lugan ni Alcantara iti agpaabagatan a direksion, inabay ti motorsiklo a nagluganan dagiti suspek ket maysa kadakuada ti nangpaltog iti sumagmamano a daras iti biktima a nagsagrapan daytoy kadagiti sugat iti nadumaduma a paset ti bagina.

Naglibas a dagus dagiti suspek iti saan nga ammo a direksion.

Naitaray ti biktima iti Central Ilocos Sur District Hospital ngem naideklara daytoy a dead on arrival.

Nakarekobre dagiti inbestigador iti nakapasamakan ti krimen iti maysa a kapsula a mapapati a nagtaud iti calibre .45.

Iti pannakiuman kenkuana dagiti kameng ti lokal a media, kinuna ni Felix a dua nga anggulo ti kitkitaen dagiti inbestigador: ti saan a nalpas a konstruksion ti P8-million a balay ken iti mapapati a panang-facilitate ni Alcantara iti pannakapasardeng ti operasion ti maysa a drug personality iti Santa Maria.

“Namnamaenyo a nakatutok ti kapolisan iti pannakasolbar iti daytoy a kaso ti pannakapapatay ni Barangay Captain Melchor Alcantara,” kinuna ni Felix.

Mainaig iti pannakapapatay ni Lailanie Florendo y Lazaga, 35, kinuna ni Felix a maysa a suspected drug personality ti biktima ket daytoy ti kitkitaenda a maysa nga anggulo iti pammapatay.

Naireport a nasarakan a maysan a bangkay ni Florendo, awanan asawa, ken residente iti Barangay Cabaritan, Sto. Domingo, Ilocos Sur, iti barangay road ti Sitio Nataynuang, Barangay Namalpalan, Magsingal, Ilocos Sur idi malem ti Marso 29.

Nagsagrap ni Florendo kadagiti nadumaduma a sugat iti rupa ken bagina manipud iti calibre .45 kas maibasar kadagiti 8 a kapsula a nasarakan iti crime scene.

Narekobre pay dagiti polis ti beltbag ti biktima a naglaon iti personal belongings, P1,500.00 iti nadumaduma a denominasion, ken maysa a sigarilio a mapapati a narolio iti marihuana.

Naiyawat dagitoy iti SOCO team nga indauluan ni Chief Inspector Leonardo Arce.

Segun pay iti inbestigasion, naudi a nakita ti biktima a nakipumpon ken nangaldaw iti natayan sadiay Barangay Cabaritan, Sto. Domingo sakbay ti pannakapapatayna.

“Manamnama ti naan-anay nga inbestigasion tapno maammuan no ania a talaga ti kinapudnona iti daytoy napasamak a pammapatay (iti Magsingal, Ilocos Sur),” kinuna ni Felix.

Kinuna pay ni Felix nga imbilinnan kadagiti COP iti kaparanget nga ili dagiti nakapasamakan dagiti krimen ti panangibaonda kadagiti inbestigadorda tapno tumulongda iti inbestigasion para iti nadardaras a pannakasolbar dagiti kaso.

Kabayatanna, sabali manen a pammaltog ti napasamak idi agarup tengnga ti aldaw ti Abril 4 iti Barangay 9, Vigan City a nakatayan ti maysa a tricycle driver.

Naideklara a dead on arrival iti Polyclinic and Hospital ni Jonathan Piñol y Pascua, 20, ken residente iti Sta. Catalina, Ilocos Sur.

Segun iti inisial a report, agpaamianan ti traysikel a minaneho ni Piñol iti Quirino Boulevard idi inabay dagiti armado a riding in tandem ket pinaltogan ti maysa ti biktima.

Nagsagrap ti biktima iti patal a sugat iti ulona a puon ti nakatayanna.

Naglibas dagiti suspek iti amianan a direksion.

Mapapati nga adda CCTV camera iti lugar a nakapasa-makan ti krimen ngem saan nga agkurkurri iti daytoy nga oras.

Ngem kinuna ni Vigan City COP Supt. Maximo Taclas a kitkitaenda ti land dispute a motibo ti nasao a pammapatay.

Nupay kasta, nagkedked ni Taclas a nangibaga iti ad-adu pay nga impormasion tapno saan a maunaan ti panagimbestigada.#