Footer

Suspek iti Arrogante slay, nabigbigen

CABUGAO, Ilocos Sur – Nabigbigen ti suspek iti pammaltog sadiay Barangay Rizal idi Marso 24 a nakatayan ti maysa a tricycle driver ken nakadunoran ti kabsatna a babai.

Nabigbig ni Analyn Arrogante y Mangrubang, 21, midwife, ti maysa a nainaganan Joji Igme, residente iti Sinait, Ilocos Sur, nga isu ti pimmaltog iti kabsatna a ni Amir Rex Arrogante y Mangrubang, 32, tricycle driver, babaen ti rogue’s gallery nga imparang kenkuana dagiti polis ditoy nga ili.

Kinuna ni Analyn a ni Igme naggian iti likud ti nagmaneho iti motorsiklo ket isu ti nangpaltog iti kabsatna a nakatayan daytoy ken nakairamananna a nasugatan iti makannigid a luppona.

Segun iti polis, saan a nabigbig ni Analyn ti nagmaneho iti motorsiklo agsipud ta adda abbong ti rupa daytoy.

Maipalagip nga idi agarup 7:45 ti rabii ti Marso 24, pinaltogan dagiti nagkalubbon a lallaki ni Arrogante bayat ti panagdaliasat ti Kawasaki Bajaj tricycle a minanehona iti national highway a sakup ti Barangay Rizal.

Nagsagrap ni Amir iti patal a sugat iti baba ti kilikilina ken iti boksitna ket naideklara a dead on arrival iti Metro Vigan Cooperative Hospital a nakaiyalisanna manipud iti Suero General Hospital nga immuna a nakaitarayanna.

Nakarekobre dagiti inbestigador iti tallo a kapsula a nagtaud iti Cal. 45 pistol iti crime scene.#