Footer

Uppat nga aldaw, Tallo a Rabii

Ababa a Nobela ni Salvador A. Espejo

Maikalima a paset

 

“Kasano nga ammom ti agiluko? Nagadalam?” namrayan a dinamag ni Randolf tapno maiwalinna ti rikna nga agpilit nga umapon iti barukongna.

“Adda asignaturami a foreign language idi addakami iti kolehio,” kinuna ni Margret. “French, Spanish, English, Tagalog, Iluko ken dadduma pay. Pinilik ti Tagalog ken Iluko. Panggepko idi pay laeng ti agpasiar iti Pilipinas nangnangruna iti Kailokuan. Kinapudnona, paset daytoy kaaddak ditoy ti thesis nga aramidek iti panagturposko iti graduate school.”

Idi makadap-aw da Randolf ken Margret iti convention hall, adun ti nadatnganda a mangmangan. Nasiputan ni Randolf ti panagmulagat ni Rey a nakakita kadakuada ken ti panangsikona kadagiti kaduana a mangmangan.

Timmakder dagiti tallo sada simmabat.

“’Su met la a didaka mabirokan ta adda gayam nalapsat a tsika a nadalapusmo,” kinuna ni Rey. “Naku, iti dayta a pammagi, uray kanionendakon, lakay, basta matagikuak!”

“Hep,” nalawag a maawatak ti imbalikasmo,” umis-isem nga insalingbat ni Margret.

“M-makasao iti Iluko?” nakigtot ni Rey.

“Wen. Kuidaw, didak mabalin nga ilako!” nagkatawa ti balasang.

Naimbag ta addaytan ni Manang Pacing.

“Makitak ket nagam-ammokayon kada Randolf,” kinunana sana kinomusta ti baro.

“Wen, Manang, nakakitaakon iti escortko a mapan agpasiar iti Callao Caves, di kadi, Randolf?” insungbat ni Margret sana pinallilitan ti baro.

“Madadaankami a mangeskort kenka sadino man a kayatmo a papanan,” inyallawat ni Freddie.

“Kasanon no agtapuakak iti derraas, sumurotkayo?” inyisem ni Margret.

“La ketdi, a,” kinuna ni Robert. “Nupay kasta, agparasiutkami.” Nagkakatawada amin.

“Umaykayon ta mangantayon,” kinuna ni Manang Pacing.

“Aggigiddantayon, Randolf,” kinuna ni Margret.

Nangalada iti pingganda sada nakipila iti lamisaan.

“Sadiay ti papananta panganan,” insungo ni Margret ti sirok ti pinuon ti kayo iti sikigan ti convention hall.

Nagdalupisakda iti karuotan.

“Maibbusmo amin dagita?” tinaldiapan ni Randolf ti napunno iti taraon a pinggan ni Margret.

“Of course, mabisinakon,” kinuna ni Margret. “Ken, adda gayam agtartaray iti darak a kinailokana.”

Naammuan ni Randolf a taga-Sinait, Ilocos Sur ti ina ni Margret. Maysa a nars. Superbisor met iti maysa a kompania ti Dutch nga amana. Natawid ni Margret ti tayag ti amana idinto a kutis ti inana ti immalaanna.

Agpayso, inkisap ni Margret ti naggian ti pinggan. Nagmayat ti tig-abna.

Nagpadispensar ni Margret. Mapan kano agsukat ken alaen ti kamerana. “See you later,” kinunana.

Insursurot ni Randolf ti panagkitana iti likudan ni Margret bayat ti isasalogna nga agturong iti cottage. Dina maawatan ti rikna nga immapon kenkuana. Agayaten? Ni kadin Margret ti nabayagen a sapsapulenna a babai?

Namrayan ni Randolf a kinuti ti abagana. Amin la a mapampanunotko, nakunana.

Bimmaba iti convention hall. Di pay nangrugi ti programa nupay dandanin maukopar amin a tugaw. Awan pay ti naisangayan a sangaili.

Winanawanan ti matana da Rey, Freddie ken Robert. Katungtungtong da Rey ken Freddie dagiti sumagmamano a mannurat a taga-Ilocos Norte ken La Union. Nailasinna iti ummong ni Andres Mandac, mannaniw a taga-Candon City.

Nakitana ni Robert a makisin-sinnutil iti dua a delegado a babbai manipud iti Isabela. Masinunuona nga ipadpadas manen ni Robert ti sikolohia a sangkakunana a nasamay a pangawisna iti panagtalek ken respeto ti pangipakatanna a ‘biktima’.

Apaman a nakatadog iti pagkonbensionan, sinabat ni Mang Joe, presidente ti Gumil-Filipinas.

“Naimbag man ta naisaparmo ti immay,” kinuna ni Mang Joe sana dinakulap ni Randolf.

“Mabalin kadi a saan, Manong,” insungbat ni Randolf. “Daytoy laeng ti gundaway nga agkikitatayo manen. Ni Manang, adda kadi met?”

“Nabati. Ammom metten, dina mapanawan ti apomi,” kinuna ni Manong Joe. “Kasano ti magasinyo?”

“Kaasi ti Dios, rumrummuar pay met laeng, Manong.”

“La, diyo baybay-an. Kasapulan dagiti mannurattayo iti ad-adu pay a pagipablaakanda.”

Adda nangtapik iti abaga ni Randolf. Ni Manong Manny, nagretiro a direktor ti Philippine Information Agency.

“Komusta, lakay,” nairut ti dakulapna. “Dandani inubonmo metten nga inabak dagiti kangrunaan a premio dagiti pasalip iti daytoy a tawen.”

“Natsambaak ti panagraman dagiti hurado, Manong,” kinuna ni Randolf.

“Daytoy ti magustuak kenka ta napakumbabaka unay.” Nagkatawa ni Mang Manny. “Ngem ad-adda pay a magustuanka no paayusam ti karabukobko inton malem.”

“Dayta la gayam, bay-am ta agpasiartanto dita downtown,” impasingked ni Randolf.

“Kaguraka la ketdi no dinak kalbiten,” kiniddayan ni Mang Manny sakbay a timmallikud.

Sumagmamano a mannurat ti naguummong iti sirok ti kayo iti sanguanan ti convention hall. Nailasin ni Randolf ni Mang Johnny, editor ti Raniag Magasin. Pinayapayan ni Mang Johnny ni Randolf.

“Kumusta, Manong?” in-tanggaya ni Randolf ti imana.

“Okey la’ng,” insungbat ni Mang Johnny.  Inyam-ammona ni Randolf kadagiti kasarsaritana. Kaadduanna kadakuada ti nakaipablaaken iti Raniag.

“Dimo koma inkuyog ni Namnama,” kinuna ni Mang Johnny.

“Nagsinakamin, Manong,” insungbat ni Randolf.

“Nagsayangen ta pinalusposam,” kinuna ni Mang Johnny. “Narigaten a makasarakka pay iti kas kenkuana.”

Nagtung-ed ni Randolf. Tallo a tawen a kaayan-ayatna ni Namnama. Iti dayta kabayag ti relasionda, dina pay naagkan. Naminsan, inallilawna ni Namnama. Impambarna nga adda daw-asenda iti Bayview Apartel kalpasan ti naminsan a panagbuyada iti sine.

Nagbalaw ni Namnama idi addadan iti uneg. Idi arakupen ni Randolf ken agdakiwasen ti dakulapna, nagsangit ti balasang. Dina kano impagarup a maaramid ni Randolf a dadaelen ti panagtalekna kenkuana.

Manipud idin, kimmayakay ti balasang kenkuana. Maysa nga aldaw, nakaawat iti surat a dumawdawat ni Namnama iti panagsinada.

(Adda tuloyna)

 

Comments are closed.