Footer

3 ubbing, nayospital gapu iti dengue

VIGAN CITY – Tallo nga ubbing ti naiyospital itay lawasna gapu iti panagsakitda iti dengue iti baet a karugrugi pay laeng ti kalgaw.

Naammuan a biktima iti sakit a dengue ti maysa nga ubing a babai nga agtawen iti 12 nga agnaed iti Barangay Don Lorenzo Querubin iti Caoayan, Ilocos Sur, maysa a lalaki nga agtawen iti 15 a residente iti Barangay Cabaroan, Sta. Catalina, Ilocos Sur, ken maysa a dua a tawenna a babai manipud iti Barangay San Julian Sur, ditoy siudad.

Uppat nga aldaw a naggurigor ti biktima a lalaki nga agtawen iti 15 ken bimmaba ti blood plateletna isu a pinai-confine ti doktora iti Gabriela Silang General Hospital.

Maysa a kita ti sakit ti dengue a kapaliiwan a kapadesna no matutudo agsipud ta magustuan dagiti lamok a pagitlogan ken pagumokan ti nabasa nga aglawlaw.

Ti panagdaldalus iti aglawlaw ti kasamayan a wagas a pangpaksiat iti dengue, daytoy ti masansan nga ipalpalagip dagiti otoridad iti salun-at.#

 

Comments are closed.