Footer

Lalaki a nakasabbikel iti paltog, natiliw

CANDON CITY – Agsakit la ketdi iti ulo daytoy a lalaki iti sanguenna a kaso gapu iti pannakakumpiska ti maysa a paltog iti ikutna iti maysa a videoke bar idi parbangon ti Hunio 1.

Saan a nakaliklik ni Luisito Cuaresma, 37, naasawaan, ken residente iti Barangay Ulo-ulo Norte, Santiago, Ilocos Sur idi kinemmeg dagiti polis kalpasan a nasiputan dagiti pannakabagi ti linteg ti nagtammukol iti siketna bayat ti panagtakderna iti ridaw ti De Javu Videoke Bar a masarakan iti Barangay Paras idi parbangon ti Hunio 1.

Maysa a cal. 45 pistol a nagmarka iti Armscor nga addaan iti magazine assembly a naglaon iti 7 a bala ti nakumpiska dagiti polis iti ikut ni Cuaresma.

Iti pannakaisurat daytoy, naipaiman iti opisina ti city prosecutor, Candon City ti kaso a panaglabsing iti RA 10591 maikontra ken ni Cuaresma para iti preliminary investigation.#

Comments are closed.