Footer

Taraon ti Panunot: Ti Kabilegan nga Amo iti Sangalubongan

Ni Tatang Lakay

Ti sariugma ni San Cristobal ti ibilangmi a maysa kadagiti kadakkelan a kibinmi iti panangtaluntonmi iti umisu a direksion iti biagmi. Ngamin, naimutektekanmi kadagiti galad ken sagudayna dagiti kangrunaan a kalasag ken instrumentotayo iti pannakibakaltayo kadagiti pannubok ti biag ken tarigagaytayo a mangikur-it dagiti gapuanantayo iti balitok a pinanid ti masakbayan.

Iti sariugma, maysa a naalumamay ken naanus a higante a lalaki ni Cristobal. Mapagpiaran ken matalek, nagserbi a nadalus ken napudno iti Ari ti Canaan. Ngem bayat ti panagserbina iti Ari, adda naun-uneg nga arapaap ni Cristobal: agserbi iti kapigsaan ken kabilegan nga amo iti sangalubongan.

Nagpakada ni Cristobal iti ari ket impalgakna ti panggepna a panangsapul iti kapigsaan nga amo iti lubong.

Nagdaliasat ngarud ni Cristobal. Adu a lugar ti nagkatangkatanganna iti panagsapulna iti kapigsaan nga amo a tarigagaynna a pagserbian. Dagiti aldaw ket nagtungpal a bulan, dagiti bulan ket nagtungpal a tawen. Adda dagiti nasarakanna nga amo ngem saan a nagbayag a nagserbi kadakuada agsipud ta napaliiwna a saanda a kas kapigsa iti arapaapna a pagserbian.

Maysa nga aldaw, nakagteng iti palasio iti maysa nga ari a kuna dagiti nagsaludsodanna a kasayaatan ken kapigsaan a mangituray iti lubong.

Napan nagtamed ni Cristobal iti ari.

“No tagipatgem, umayak agserbi kenka, natan-ok nga ari,” kinuna ni Cristobal.
Rinukod dagiti mata ti ari ni San Cristobal, kadagiti nasabang nga abaga daytoy, kadagiti simmabunganay a takiagna, ken iti kudil a tinenneb ti init ken tudo iti panagkalkallautangna iti disierto ken kapanagan iti panagsapulna iti pagserbianna nga amo.

“Dutokanka a mangidaulo kadagiti buyotko,” inkeddeng ti ari. Pinagindegna pay ni Cristobal iti kortena.

Maysa nga aldaw, malmalday ti ari ket pinaayabanna ti bullalagaw a mangparagsak kenkuana.
Nadumaduma dagiti impabuya ti bullalagaw ngem dina man la napaisem ti ari. Madamdama, nagkanta iti maipapan iti demonio.

Napaliiw ni Cristobal a tunggal madakamat ti nagan ti demonio, naimaldit ti buteng iti rupa ti ari ket dagdagusenna ti agkurus.

“Apay a tunggal dakamaten ti bullalagaw ti nagan ti demonio, agkuruska, napateg nga ari?” sinaludsod ni Cristobal.

Kabutengko ti demonio. Ti krus ti pangpaadayok kenkuana,” insungbat ti ari.

Saanen a nagtimek ni Cristobal. Ngem nakarikna iti pannakapaay. Iti paniriganna, saan gayam a ti ari a pagserserbianna ti kapigsaan iti lubong. Kabutengna ti demonio, ngarud, napigpigsa ken nabilbileg ti demonio.

Malidayan ni Cristobal a nangpanaw iti ari idinto a kinunana: “Tarigagayko ti agserbi iti kabilegan iti lubong. Panagkunak, ti demonio dayta, agsipud ta agbutengka pay kenkuana.”

Nabayag a nagkatangkatang ni Cristobal, naipadpad kadagiti nadumaduma a lugar ngem saanna a masapulan ti demonio. Dagiti dadduma a pagsaludsodanna, madakamat laeng ti nagan ti demonio, agkurusdan sada dagdagusen ti pumanaw.

Nasalaw ni Cristobal ti maysa a grupo dagiti mannakigubat. Inalikubkob dagiti mannakigubat ni Cristobal. Inasitgan ti panguloda: nauyong ken nakabutbuteng ti rupa ti lalaki.
“Ania ti gagaram ditoy teritoriok?” kinuna ti pangulo dagiti mannakigubat. “Dika kadi mabuteng kaniak?”
“Birbirokek ti demonio ta kayatko ti agserbi kenkuana,” insungbat ni Cristobal.
“Siak ti demonio. Siak ti birbirokem,” kinuna ti lalaki.
Nagtamed ni Cristobal sana inkari ti kinapudnona iti pagserbianna a demonio.
(Adda tuloyna)

Comments are closed.