Footer

2-tawenna nga ubing, napaltogan

SAN JUAN, Ilocos Sur –  Napaltogan ti maysa nga ubing nga agtawen iti dua bayat ti panangrabiida a sangapamilia iti pagtaenganda idi sardam ti Hunio 12.

Iti pannakaisurat daytoy maob-obserba iti Gabriela Silang General Hospital ti kasasaad ti  biktima a nagsagrap iti sugat iti tian kalpasan a naiyalis ditoy manipud iti Magsingal District Hospital nga immuna a nakaitarayanna.

Segun iti report manipud iti San Juan Police Station, madama ti panangrabii ti biktima ken dagiti nagannak ken kakabsatna iti balayda idi nakangeg ni Mary Joy Rivera, ina ti biktima, iti kanalbuon g a naggapu iti akin-abagatan a paset ti balayda.

Dinagdagus ni Rivera nga inarayat ti anakna idi makitana a matuang daytoy ken adda dara iti likudna sada intaray iti Magsingal District Hospital.

Nakarekobre dagiti nagresponde a polis iti maysa nga slug manipud iti saan nga ammo a kalibre ti nakapasamakan ti pammaltog.

Saan pay nga ammo ti motibo ti pammaltog ngem kitkitaen dagiti polis ti anggulo a maysa kadagiti kameng ti pamilia ti pudpudno a puntiria a paltogan ti di nabigbig a suspek.

Kabayatanna, awan pay pakabigbigan iti suspek iti pammaltog sadiay Barangay Quezon, ditoy nga ili idi rabii ti Hunio 5 iti baet ti agtultuloy a panagimbestiga ti kapolisan para iti pannakasolbarna.

Iti naudi a report manipud iti polis ditoy, awan pay pakabigbigan iti suspek a nangpaltog ken ni Emerito
Salom y Dolores, 46, naasawaan, ken residente iti nadakamat a barangay agsipud ta awan ti makaited iti impormasion iti identidad ti pimmaltog.

Napaltogan ni Salom idi agarup 9:50 iti rabii ti Hunio 5 ket naideklara a dead on arrival  iti ospital a nakaitarayanna gapu kadagiti sugatna iti ulo, likud ken makannigid a takiagna a mapapati a nagtaud iti cal. 45.

Mapapati pay a nagkitakit ti pamilia ti biktima a makikooperar iti kapolisan ken dida impalubos a maautopsia ti bangkay ti biktima.

Nupay kasta, kinuna ti polis nga agtultuloy latta ti panagimbestigada para iti pannakasolbar ti kaso.#

Comments are closed.