Footer

3 trabahador nabtakan iti tangke ti gas, natay iti ospital

BANTAY, Ilocos Sur –  Nagsasaruno a natay iti ospital a nakaiyalisanda dagiti tallo a  trabahador a nauram gapu iti panagbettak ti tangke ti gas iti compound ti maysa a pasdek-negosio sadiay Barangay Paing, ditoy nga ili idi Hunio 6.

Pimmusay iti Baguio General Hospital ni Cesar Espiritu y Soles, 48, baro, refiller dagiti tangke, ken residente iti Barangay Anyo, San Fabian, Pangasinan idi Hunio 8; natay idi Hunio 9 ni Renato Paet y Lopez, 43, naasawaan, crane operator ken assistant mechanic ti Satrap Construction ken residente iti Barangay Tay-ac, Bantay, Ilocos Sur; ken idi Hunio 10 ni Moises Gadut y Forneas, 27, baro, helper, ken residente iti Barangay 9, Vigan City.

Immuna a naitaray dagiti tallo iti Metro Vigan Cooperative Hospital ket gapu iti nakaro a pannakauramda, naiyalisda iti Baguio City General Hospital and Medical Center ngem kaskasdi a dida nakalasat.

Sabali pay a trabahador, ni Raden Alporo y Alano, 39, naasawaan, refiller iti tangke, ti nagsagrap laeng iti minor injuries iti tengnged ken likud ti imana ket agpapaimbag iti Metro Vigan Cooperative Hospital.

Nadepdep dagiti apagbiit a simged nga LPG tanks babaen dagiti nagresponde a bumbero ti Bureau of Fire Protection, Bantay, JTC Mall ken PMFTC.

Segun iti inisial a panagimbestiga, kabayatan ti pannakaiyalis ti maysa nga LPG storage tank iti compound a kukua ti RKT Marketing a kukua ni Richard K. Tan babaen ti crane nga inopereyt ni Pablo Bermudez y Cabalo, 53, naasawaan, ken residente iti Barangay Sinabaan, Bantay, Ilocos Sur, naitupa ti drain valve ti tangke iti kongkreto a platform a  nakaigapuan ti panagubona.

Naibilin iti operator ti panagsardengna ngem kellaat a bimtak ti agub-ubo a tangke a puon iti grabe a nakauraman da Paet, Gadut, Espiritu ken Alporo.

Saan pay nga ammo ti balor dagiti nadadael a sanikua ngem agtultuloy ti panagimbestiga dagiti otoridad.