Footer

Baket, napukawna kuarta, alahasna iti Budol-Budol Gang

STA. CRUZ, Ilocos Sur – Kuarta ken alahas ti napukaw ti maysa a baket iti maysa a grupo a mapapati a kamkameng a mangal-allilaw kadagiti tattao iti tiendaan publiko ditoy nga ili idi malem ti Hunio 5.

Iti pulongna iti polis, kinuna ni Silvestra Obille y Obar, 75, naasawaan, ken residente iti Barangay Calaoaan, ditoy nga ili, a napukawna ti kuartana a P150,000.00 ken alahasna nga agbalor iti P20,000.00 iti grupo dagiti di nabigbig a tattao a mapapati a nangawis kenkuana iti transaksion a pagkakuartaanna.

Segun ken ni Obille, idi agarup 4:35 ti malem ti Hunio 5, bayat ti kaaddana iti public market daytoy nga ili, inasitgan ti maysa a grupo ket kinumbinsida a makinegosio kadakuada tapno mapaaduna ti kuartana.

Kinuna ti baket a no agdeposito kadagiti suspek, agdoble ti kuartana a P150,000.00.

Naay-ayo ti biktima ket inruarna ti kuartana iti Sta. Cruz Cooperative Bank sana inkabil iti bagna sa napan nakisinnarak iti grupo.

Inawis ti grupo ti baket a mapanda iti Jolibee Candon tapno ituloyda ti agpapatang.

Bayat ti panagdaliasat ti navy blue a lugan ti grupo, naallukoyda manen ti baket a mangiyawat iti P150,000.00 ken alahasna sada inkabil iti sabali a bag.

Idi makagtengda iti Barangay Saoat, imbaga ti maysa kadagiti suspek nga umuna laengen ti baket iti Jolibee Candon agsipud ta mapanda pay alaen ti orderda a yero.

Insubli ti grupo ti bag ti baket sada indissaag.

Nagsubli ti baket iti Candon sa napan naguray iti Jolibee kas imbaga ti grupo a pagkikitaanda. Ngem sumagmamano nga oras ti limmabas ket awan met laengen dagiti ur-urayenna.

Nagsuspetsa ti baket idi nakitana a naikkan iti padlock ti sipper ti bagna ket dagus a napan nagpulong iti municipal police station ti Sta. Cruz.

Dinadael dagiti polis ti padlock ket idi iyaonda ti naggian, pasig metten a pappapel.

Nagsawar dagiti polis ngem saandan a nabirokan pay dagiti suspek.#

Comments are closed.