Footer

Bareng di mairaman iti atiddog nga estatistika dagiti krimen a saan a nasolbar

 

    Sinuspende ti Philippine National Police amin a permit nga agikuyog iti paltog iti sibubukel a Pangasinan kas resulta iti  pammilinna a pannakakemmeg dagiti nangpapatay ken ni Urbiztondo Mayor Ernesto Balolong Jr. a kapartiduanna iti Liberal Party.

Kas panagtungpalda iti Presidente, nangiyisio ni Chief Supt. Roman A. Felix, Police Regional Office 1 iti pammilin ken ni Senior Supt. Sterling Blanco, OIC the Police Pro-vincial Office (PPO) a nang-suspende iti panagikuyog iti armas iti ruar ti pagtaengan.

Kanaig daytoy, pimminget ti kapolisan iti panangiyimple-mentarda iti gun ban babaen ti panangipakatda kadagiti check-points ken panagmonitor kadagiti luglugar a matatao tapno masigurado ti seguridad dagiti tattao.

Maipalagip a napapatay ni Balolong agraman ti badigardna a ni POI Eliseo Ulanday ken maysa nga empleado ti munisipio nga agnagan Edmund Meneses.

Sigida a binuangay ti kapolisan ti Task Force Balolong ket dua a suspek ti inarestoda: ni Eduardo de Guzman, alias “Gading”, taga Salomague Norte; ken  ni Marito Femin, 48, taga-Pangaspasan, agpada a barangay iti Bugallon. Natiliw dagiti dua iti mapapati a nagpainganda kalpasan ti pammapatay.

Ngem alegasion ti pamilia ni Balolong a dakkel a tao iti probinsia ti adda iti likud ti pammapatay agsipud ta nabayagen daytoy a kabusor ti mayor ken mapapati a nagbalballaag pay daytoy.

Iti panangibilin a mismo ti Presidente iti pannakatiliw ti mastermind iti pammapatay, kasapulan ngarud ti kapolisan ti Pangasinan iti panagtanang iti daytoy a panagimbestigada tapno ti laeng pudno a nangisayangkat iti pammapatay ti maisaklang iti linteg. Saanda koma nga agpaltuad kadagiti suspek uray no awan ti pakainaiganda iti krimen. Kasta met nga awan ti santuenda iti panangtuntonda iti  hustisia, uray ania ti kinaasino ti adda iti likud ti pammapatay, uray kasano ti kadakkelna ken kabilegna iti probinsia kas alegasion ti pamilia ti biktima.

Masipsiputan ngarud ti resulta ti panagimbestiga ti kapolisan iti pannakapapatay ti mayor, ti badigardna ken maysa nga empleado ti munisipio.#

Comments are closed.