Footer

Frozen foods traders, sumurot iti ordinansa – slaughter master

VIGAN CITY – Mapalubosan dagiti frozen foods a maiserrek iti Vigan no la ketdi masurot dagiti agnegnegosio dagiti nakalanad iti ordinansa ti siudad, segun iti slaughterhouse master ditoy siudad.

Kinuna ni Vigan City Slaughterhouse Master Arnulfo Quitoriano nga awan pay ti napalubosan nga agiserrek iti frozen foods iti tiendaan publiko agsipud ta awan ti naan-anay a pasilidad dagiti aglako, kas iti freezer a pagistakanda kadagitoy a tagilako.

Kinuna ni Quitoriano a nailanad iti ordinansa nga adda required temperature ti lugan a nakaikabilan dagiti frozen foods kasta met iti pakaiyalisanda a pasilidad tapno mapagtalinaed ti nasayaat a kalidad dagiti tagilako.

Segun ken ni Quitoriano, sakbay nga ideliber dagiti negosiante dagiti frozen foods kadagiti kustomerda iti Vigan a pakairamanan dagiti  sumagmamano nga agbagbagnet ken agar-aramid iti longganisa, aglasatda pay iti check-up manipud kenkuana tapno makita no nadalusda kasta met a masurot ti required temperature ti lugan a nakaikabilanda.#

 

Comments are closed.