Footer

Kinasimple

Kolum : Sinursuran

Ni Jobert M. Pacnis

(Maudi a paset)

 

Ibalakad dagiti eksperto ti panagmenor, panagsarimadeng. Iti panagsarimadeng, maikkantayo iti gundaway a mangutob kadagiti naimbag nga aramidentayo. Mapanunot: makatulong kadi met laeng iti bagi wenno kasasaad ti pampanunot daytoy nga aramidek?

Kasapulan ti utek ti inana tapno makapartuat kadagiti hormone a makatulong iti panagdesisiontayo. Iti panagsarimadeng ngarud, makainana ti isip, makapanunot kadagiti bambanag a rumbeng. Maipokus ti atension. Maileppas ti trabaho a di dinadaras/agdardaras.  Ta kasapulan ngamin, aya, ti panagdardaras iti panggedan?

Panunoten laengen a tunggal banag, adda oras a nailatang tapno maasikaso, mairingpas ken maikkan iti panawen. Pagdaksanna ngamin, nalaingtayo nga agitantan kadagiti trabaho. Ngarud, rumbeng nga ikkatentayo daytoy naalas nga aramid. Ikumit ti bagi nga aramidenna iti dayta nga aldaw dagiti rumbeng a maaramid tapno awan ti rason nga agdardaras a mangiringpas inton madanonen ti pannakasapul dayta.

Agbiagtayo a simple, dayta ti kasimplean a wagas tapno agbalin a naragsak, nasao itayen.

Pagpampanunotan dagitoy: Nalaka a sursuroen ti simple a makina. Napardas nga agsepen ti utek dagiti simple ti pannakaisurona a leksion. Nalaka nga adalen dagiti simple a sala, sarita, daniw ken kanta. Nalaka ti sumurot iti simple a linteg.  Makaay-ayo a mingmingan dagiti simple a ladawan— aglalo ti simple a ladawan ti nakaparsuaan. Ken naim-imas nga ipauneg dagiti simple a taraon a kas kadagiti nateng ken prutas. Dagitoy, mangipaayda kadagiti babassit a ragsak iti inaldaw a mangpunno iti kinakawaw iti panagbiag.

Ngarud, apay a pagbalinen a komplikado dagiti banag?

Iti laengen pannakilangen iti pada a tao, no nasaktan ti rikna, apay a pagbalinentayo a komplikado/narikut ti kasasaadtayo babaen ti panagimula iti sakit ti nakem? Ken panagplano iti panagibales? Simple a panangpakawan iti nagbasol ti makaited iti kappia ti kaunggan. Nagsimple. Apay a dadaelem dayta gapu iti stress?

Paset ti simple a panagbiag ti panagsakripisio. Ngem daytoy a panagsakripisio, itundana ti tunggal maysa iti ragsak a sapsapulenna iti inaldaw. Ta ti panagsakripisio, pannakipagmaymaysa iti Namarsua kadagiti bilinna.

Ngem pudno man la unay ti nakuna ni Rev. Fr. Melchor  B. Palomares iti salaysayna iti Bannawag: Iti agdama, agbibiagtayo a nanam-ay ket liklikantayo ti agrigat ken agsagaba. Wen nga agpayso, saan kadi? Manmanon ti magmagna iti papananna ta adun ti lugan. Awan unayen ti agtawing wenno agsakdo iti danum a masapulna ta addan makina a pagpauli iti danum. Ken nakaad-adu dagiti ramit a bunga ti teknolohia a nangibunga iti pannakapalag-an dagiti trabaho. Adu payen dagiti instant a pagnam-ayan iti agdama. Instant coffee, instant noodles…

Ken adda payen ang-angaw, a napnuan kinapudno, nga addan instant baby ken instant asawa.

Ania ketdin nga agpayso ti namalbaliwan ti biag!

Saan met ketdi nga ipawil ti Dios dagitoy a pagnam-ayan. Ngem rebbengna a kitaen, timbangen ti amin tapno mabalanse ti biag. Ken saan a makadadael kadagiti sagut ti Namarsua.

Ngem no kunaem latta a naliday ti biag, naatap ti ragsak, iti baet ti kinasimple ti biag, nalabit adda dakkel a persat ti biagmo a kurang.

Pasetnatayo ti Dios, dayta ti kinapudno. Ngarud, no ditayo marikna dayta ragsak a kalkalikaguman ti Dios iti tunggal maysa kadatayo, nalabit adayotayo Kenkuana. Nalipatan ti kaaddana. Nakapokus ti atensiontayo kadagiti enerhia, arapaap ken pirak.

Ngarud, rumbeng a mangabaruanantayo. Malaksid iti kinasimple ti panagbiag, masapul met a natibker ti tali a namagsinggalot iti relasiontayo iti Dios. Ta no addatayo iti appupona, asino koma ti kabutengtayo? Ania koma ti pakaburiboratayo? Ania koma ti pagdanagantayo?

Agbiagtayo ngarud a simple iti sidong ti Dios. Immaytayo a silalamolamo ditoy lubong, panawantayo met laeng a kasta ti kasasaadtayo. Awan ti maitugottayo. Ditayo ngaruden pagdadarasan amin nga aramid. Mapnektayo iti adda…#