Footer

No Koma Lan Mabalin

ni Arlane P. Manzano

 

MABURBURTIAAK man no dadduma, kabagis, kadagiti galad wenno ugalitayo. Mabalin nga uray sika, saanmo met a maibagasan uray pay ti bukodmo a bagi. Adu ti misterio ti pannakaitaotayo, ngem ad-adu nga amang ti misterio ti panagbiag ditoy rabaw ni apo daga. Maysa kadagitoy ti kababalintayo aglalo kadagiti nadumaduma a situasion.

Idi agbasbasaak pay laeng iti kolehio, tinarigagayak ti makaturpos iti kabiitan a panawen tapno makapagtrabahoakon (malaksid a makapasulit ti agbasa!) ket addanto metten kabukbukodak a kuarta. Idi agisuroakon, kasla kayatko manen koma nga agsubli ti kinaestudiantek, a dumawdawat laeng iti abasto manipud kadagiti nagannak kaniak. Apay? Narigat ti agbasa ngem narigrigat gayam ti agsapul iti kuarta.

Adda met dagiti dadduma pay a maipada a paspasamak iti inaldaw-aldaw iti kumplikado a panagbiagtayo.

No kalgaw, “Aponay metten ti kastoy a biag! Nadagaang ti tiempo. Makapasakit iti ulo ti pudotna. Disiembre koman ta lumamiis metten ti aglawlaw.”

Disiembre. “Pirmi metten ti lamiisna. Agsusukoten ti ulesko, kumutukot latta ti lamiis. Agreumaak sa payen.”

“Agtudo koma, matikaganen dagiti pagay,” idawat dagiti mannalon.

Pinatgan ti langit ket nagtudo iti kapkapnekanna. “Yamanen pay Apo, madanumanen dagiti talon.” Inton mabaybayag, “Isardengmo koman Apo ti tudo, aglayusen…”

Ti agsensennaay nga adalan (uray mangisursuro!) tunggal malem ti Domingo, “Lunes manen no bigat, Biernes koman ta bakasion manen.”

Madanon ti Biernes, “Nagdaras ti aldaw, Biernes manen, madamdama Lunesen.”

“Makasidsidaak iti lauya a karne ti baboy.” Adda a naipasango, “Diakon kayat, makapasuya met.”

“Makaramramanak iti nalamiis a nasam-it.  Inton adda, “saanen, naalsem koma laengen.”

No sika a maseknan, mabalin a kunam a normal laeng dagitoy wenno no mautobmo, kasla adda kabuyogna a sabali dagiti aramidmo.

Ngem no sika ket maysan a dumdumngeg wenno saksi kadagitoy a saan a maawatan a galad ti maysa a parsua, mabalin a kaumam a denggen wenno makaungetka pay ketdin.

Ket no sika koma ni Apo Dios a Namarsua, ania met koma ti agbalin a reaksionmo? Maragragsakanka ngata? Makapungtotka? Makakatawaka? Maumaka met? Wenno iyad-addam ketdi nga iparikna ti nagbiddutanda ta mariknada ti kinaawan bain dagitoy a parsua?

Wen, apay ngata a narigat a maawatan dagiti kababalintayo aglalo kadagiti kakastoy a bambanag? Narigat a pagustuan dagiti pagayatan. Adu dagiti tarigagay a no magun-oden, saantay’ met gayam a kapkapnekan. Papananna, agsapultayo manen. Ket sabalinto manen a pakasaritaan dagiti saan a maungpot a tarigagay ken di pannakapnek!

No koma lan nalaka a mapnek ti tao… mapukaw koma dagiti barrairong ken dagiti elemento ti kinadakes. Awan koma ti pannakailunod ti puli.

Saan koma a mabalangkantis ti nakaparsuaan.

Awan koman ti pagdandanagan a pannakaungaw ti lubong. Nagsayaat koman ti biag.

Apay ket ngamin a di agressat ti panagsapultayo iti awan ket pilitentayo a gun-oden ti imposible? Tsk… tsk… tsk. Taotay’ ngamin.

Man wants it cold when it’s hot

and wants it hot when it’s cold.

Man does always want what is not.#