Footer

Pagtagilakuan, natakawan

STA. CRUZ, Ilocos Sur – Maysa a pagtagilakuan iti  tiendaan publiko ditoy nga ili ti naireport a natakawan idi agsapa ti Hunio 8.

Inreport ni Pedrico Pacis y Castaneda, 54, guardia, a natakawan ti Lumen and Dolor Mini-Mart a kukua da Felumina Lacasandili ken Dolores Farinas  a masarakan iti tiendaan publiko ditoy.

Segun iti inisial nga inbestigasion, nakastrek ti/dagiti di nabigbig a suspek iti pagtagilakuan babaen ti yuulida iti scaffolding a maar-aramat iti konstruksion iti nasao a mini-mart ket idi addadan iti uneg, pinorsarda a linuktan dagiti tallo a cubicle counters ket kinasakasda dagiti sensilio nga agdagup iti sumurok-kumurang P5,000.00.

Nakasarak pay dagiti inbestigador iti naginoman a Gatorade iti bubong ti mini-mart.

Nasukalan ti panagtakaw idi naglukat ni Romel Acosta y Lemayo, 39, naasawaan, checker iti pasdek, iti agarup 7:00 iti agsapa iti dayta a petsa.

Nakaala dagiti inbestigador kadagiti lemma ti ramay ti/dagiti suspek a posible a pakabigbigan dagitoy.#

 

Comments are closed.