Footer

Ti Kabilegan nga Amo iti Sangalubongan

Ni Tatang Lakay

(Tuloyna)

 

Simmurot ni Cristal iti grupo dagiti mannakigubat. Bayat ti pannakiludonna kadakuada, napaneknekanna a kabutbuteng dagiti tattao ti demonio a panguloda.

Madamag laeng dagiti tattao ti isasangbayna iti lugarda, dagdagusendan ti agkurus sada itantanamitim: “Adaywandakami, demonio!”

Ti demonio ti kapigsaan ken kabilegan nga amo iti lubong,” nakuna ni Cristobal iti bagina.

Maysa nga aldaw, bayat ti panagdaliasat dagiti mannakigubat, nalabsanda ti krus iti nagsangaan ti dalan. Dinagdagus ti demonio ti simmiasi iti dalan tapno adaywanna ti krus.

“Apay a kasdiay ti inaramidmo?” dinamag ni Cristobal.

Nagulimek iti nabayag ti sairo sakbay a simmungbat. “Adda idi lalaki nga agnagan iti Hesus a nailansa iti krus,” inlawlawagna. “No makitak ti pagilasinanna, mabutengak ket dagdagusek nga adaywan.”

“Nabilbileg ken naturturay ngarud ni Hesus ngem sika,” kinuna ni Cristobal. “Panawanka ngarud ket birokek ni Hesus, asinoman isuna.”

Nabayag manen a nagkatangkatang ni Cristobal iti panangsapulna ken ni Hesus. Adu dagiti nagsalsaludsodanna no pakasarakanna kenkuana. Adu met dagiti nakadamdamag iti dayta a nagan ngem saanda a maipatuldo no sadino ti pakasarakan kenkuana. Ketdi nadlaw ni Cristobal a tunggal madakamat ti nagan a Hesus, agtamed dagiti tattao ket napatalgedan ti riknana a daytoyen ti kapigsaan ken kabilegan nga amo a pagserbianna.

Kalpasan ti naunday a panagsapulna, nasalaw ni Cristobal ti maysa a relihioso nga ermitanio a nangpasangbay kenkuana.

“Birbirokek ni Hesus. Pakasapulak kenkuana tapno agserbiak kenkuana?” sinaludsod ni Cristobal.

“Ania ti ammom maipapan ken ni Hesus?” sinaludsod ti ermitanio.

“Iti panagsapsapulko iti kapigsaan ken kabilegan nga amo, napaneknekak nga uray ti demonio ket agbuteng kenkuana. Panagkunak, isu ti sapsapulek a pagserbian nga amo.|”

“Saanka pay a sisasagana nga agserbi ken ni Hesus. Tapno maaramidmo dayta, kasapulan nga agayunaka,” kinuna ti ermitanio.

Kinuna ni Cristobal, “Diak maaramid dayta. Agkiddawka iti sabali.”

“Ala ngarud,” kinuna ti ermitanio, “agriingka a masapa iti bigat ket agkararagka iti mabayag.”

“Pangaasim,” kinuna ni Cristobal, “dika kadi makabirok iti nasaysayaat nga aramidek? Diak makapagkararag iti mabayag.”

Nagpanunot ti ermitanio sana kinuna, “Ala wen. Natayag ken napigsaka. Bumabaka ken agnaedka iti igid ti karayan ket iballasiwmo nga ibaklay dagiti agkasapulan. Iti dayta a wagas, makapagserbika ken ni Hesus. Mangnamnamaka nga agparangto kenka iti maysa nga aldaw.”

Nagpatakder ni Cristobal iti bassit ngem naimeng a kalapaw iti asideg ti karayan ket babaen ti tulong ti kawayan a sarukod, imbaklayna nga imballasiw dagiti nabaknang ken napanglaw iti napegges a karayan.

Maysa a rabii, kabayatan ti nargaan a pannaturogna nakangeg iti timek ti bassit nga ubing nga umaw-awag kenkuana. Bimmangon ni Cristobal. Nagturong iti karayan. Ubing a lalaki ti nadatnganna iti igid ti karayan.

“Cristobal, iballasiwnak koma,” kinuna ti ubing.

Saanen a nagpangadua pay ni Cristobal. Imbaklayna ti ubing iti abagana ket rinugianna ti bimmallasiw iti karayan. Umad-adalem ti karayan, dumagdagsen ti ubing. Iti unos ti panagbiagna, ita laeng a mapadasanna ti agibaklay iti ingget dagsen, kaarigna kadagsen ti lubong. Iti umuna a gundaway iti biagna, nakarikna ni Cristobal iti panagbuteng. Mabuteng a dina maiballasiw ti ubing iti karayan.

Kamaudiananna, impakatna amin a kabaelanna nga immaddang agingga iti naiballasiwna ti ubing iti karayan.

Napnuan alikaka nga indissona ti ubing iti teppang. Inyiladna lattan iti daga gapu iti nakaro a paksuyna.

Tinaldiapanna ti ubing ket kinunana, “Annugotek a dandanika di naiballasiw… Panagriknak, awitko ti dagsen ti sibubukel a lubong iti abagak.”

Kinuna ti ubing, “Dayta nga agpayso ti inaramidmo. Siak ni Hesus a pagserbiam iti lubongmo. Pinarnuayko ti lubong ket iti panangibaklaymo kaniak, inawitmo metten ti lubong. Ket tapno mapaneknekan a pudno daytoy, itugkelmo ti sarukodmo iti daga iti asideg ti kalapawmo ket inton bigat, agbulong, agsabong ken agbunga.” Nagpukawen ti ubing.

Kabigatanna, nakita ni Cristobal nga adda bulong, sabong ken bunga ti sarukodna. Ammonan a nagserbianna ti katan-okan ken kabilegan nga amo iti sangalubongan.#