Footer

BANNER NEWS: Opisial ti pagbaludan, 2 prov’l guards, napilaan criminal, administrative case

NARVACAN, Ilocos Sur – Pinilaan ti kapolisan ditoy nga ili ti maysa nga opisial ti pagbaludan ken dua a guardia iti probinsia iti criminal ken administrative complaints mainaig iti pannakalibas iti maysa a lider ti gun-for-hire group idi Hunio 30.

Pinilaan ti Narvacan police da Ilocos Sur Provincial Warden Vicente Amistad, PGI Efren Marzan, ken PGI Juanito Mercurio, Jr. iti criminal ken administrative complaints for infidelity in the custody of prisoner through negligence punishable under Article 224 of the Revised Penal Code and Gross Neglect of Duty a nagtungpal iti pannakalibas idi Hunio 30 ni Rodrigo Abiang, alias Lodring, lider ti notorious gun-for-hire group nga agop-operate iti Ilocos Sur ken Abra.

Naisaklang dagiti tallo iti sanguanan ti Military and Other Law Enforcement Offices iti Opisina ti Ombudsman itay Hulio 9.

Naipatulod metten dagiti rekord dagiti nasao a complaint maikontra kadagiti tallo a respondente ken ni Deputy Ombudsman for the MOLEO, Cyril Ramos.

Mabirbirok pay agingga ita ni Abiang.

Maipalagip nga idi Hunio 30, ineskortan da Mercurio ken Marzan ni Abiang a napan iti Narvacan Regional Trial Court, Branch 22, para iti pannakabista ti kasona nga illegal a panagikut iti paltog.

Agsipud ta nasapa pay, mapapati a napan nagsinanglaw dagiti guardia iti maysa a panganan iti asideg ti korte.

Idi nakauneg dagiti guardia iti pagsinanglawan, kellaat a nagtaray ni Abiang a nagpalaud iti direksion ti Barangay Abuor.

Kinamat dagiti guardia ti balud ken nagpaputokda pay kas warning shot ngem saan a nangitaltalek ni Abiang agingga a naadaywanna dagiti kumamkamat kenkuana.

Saan a nakaposas ni Abiang idi linibasanna dagiti guardiana.

Nangisayangkat dagiti nagtitipon nga elemento ti CIDG, Ilocos Sur, Narvacan police ken Provincial Public Safety Company iti manhunt operation ngem negatibo ti resultana.

Negatibo met ti resulta ti panagsapul dagiti intel operatives kadagiti posible a nagpaknian ti naglibas a balud.

Inalerto metten dagiti polis dagiti nadumaduma a barangay intelligence network iti Narvacan tapno monitorenda ti presensia ti asinoman a maisar-ong iti lugarda para iti posible nga operasion ti kapolisan.

Sakbay ti panaglibasna, inaresto dagiti nagtitipon nga elemento ti CIDG, Narvacan ken Santa police ni Abiang sadiay Santa babaen ti warrant of arrest nga inyisio ni Judge Sixto D. Diompoc ti RTC Branch 72, Narvacan, gapu iti kasona a frustrated murder a nai-docket babaen ti Criminal Case No. 3791-N.#