Footer

Liga dagiti Bise Mayor, suportaranda ti Vigan iti New7Wonders Cities

VIGAN CITY – Impakaammo ni Vice Mayor Lourdes Baquiran nga impatalged kenkuana dagiti padana a bise mayor ti suportada iti kampania ti Vigan City a mairaman iti New7Wonders Cities of the World.

Segun ken ni Baquiran, inaramatna a gundaway ti miting ti Vice Mayors’ League of the Philippines a nagkampania kadagiti padana a bise mayor ket impatalged met dagitoy ti panangibutosda iti Vigan tapno mairaman iti top 14 finalists iti penultimate stage ti kampania para iti New7Wonders Cities of the World.

Kinuna pay ni Baquiran a naammuanna pay kadagiti bise mayor ti panagkampania ni Konsehal Carlo Medina kadagiti kabaddungalanna a konsehal para iti panangitandudoda iti Vigan iti kampania a mairaman iti New7Wonders Cities bayat ti Philippine Councilors’ League meeting a naaramid met itay nabiit.

Itay Hulio 7, nairaman ti Vigan a maysa kadagiti 21 finalists para iti New7Wonders Cities of the World.

Makissayan ti bilang dagiti finalists iti 14 inton Oktubre 7 santo ti pinal a New7Wonders Cities inton Disiembre 7.#