Footer

BANNER NEWS: 14 tattao, inaresto dagiti polis gapu iti panagminas

SANTA, Ilocos Sur – Sangapulo ket uppat a tattao a pakaibilangan ti dua a menor de edad ti inaresto dagiti polis gapu iti panagminasda iti Barangay Rancho ditoy nga ili idi rabii ti Hulio 10.

Tiniliw dagiti polis nga indauluan ni Police Senior Inspector Napoleon Siyo Gao-ay, OIC, da Darwin Rafal y Quillopo, 34; Jansen Quillopo y Quillopo, 22; Jonel Rabola y Rafal, 23; Jeremy Rabena y Quiocho, 18; Gary Quillopo y Quiocho, 37; Manuel Llanes y Rabena, 34; Jason Llanes y Quillopo, 29, Hector Ancheta y Llanes, 34; Leonardo Lacerona y Baginun, 60; Robert Amicay y Doria, 51; Marvin Beltran y Calpito, 25; Erwin Quillopo y Rafal, 32; ken da Marco, 17; ken Andy, 17 (parbo a nagan agsipud ta menor de edadda); agpapadada amin a residente iti   Barangay Puro, Caoayan, Ilocos Sur.

Naitimbre iti polis dagiti suspek nga aggasgasagas iti balitok iti Barangay Rancho, Santa, Ilocos Sur, partikularly iti Snake Island ket nagtignay a dagus dagiti pannakabagi ti linteg ken nakikoordinarda kadagiti opisial ti barangay para iti pannakaapput dagiti agminminas.

Nakumpiska manipud kadagiti suspek ti uppat nga improvised strainers, 2 shovels, 2 a timba ti nangisit a darat a mapapati nga adda balitokna, maysa a bolo ken dadduma pay a ramit para iti panaggasagas iti balitok.

Kanaig daytoy, naiyendorson iti Opisina ti Provincial Prosecutor ti kaso a panaglabsing iti RA 7076  “People’s Small-Scale Mining Act of 1991″ maikontra kadagiti naaresto ket nai-docket ti kaso iti babaen ti I.S. No. I-03-INQ-14G-00110.

Nupay kasta, nasuspende ti kulpabilidad dagiti dua a menor de edad ket naiyendorsoda iti DSWED-MSWO iti Caoayan, Ilocos Sur babaen ti direktiba ni Atty. Edgar A. Martin, Jr., inquest prosecutor.

Natiliw dagiti small-time nga agminminas agarup makabulan kalpasan ti naangay a prayer-rally iti Hunio 22 iti Caoayan, Ilocos Sur nga indauluan dagiti papadi gapu iti mapapati a black sand mining iti probinsia.

Sakbayna, babaen ti pastoral letter, kinondenar ni Fr. Cosmenio Rosimo, numero uno a kritiko ni Gov. Ryan Singson, ti mapaspasamak a black sand mining iti probinsia, partikular iti Caoayan.

Ngem kinuna ni Singson a sipud pay nagtugaw a gobernador, nabatad ti pagtaktakderanna a saanna nga ipalubos nga adda panagminas iti black sand iti probinsia.

Indawat ti gobernador a siputanda dagiti bapor a nagpundo iti kabaybayan iti ili a Caoayan ket ipulongda kenkuana no black sand mining ti aramidenda a saan ket a dredging.

Iti maysa nga interbio ken ni Caoayan Mayor Germie Singson-Goulart, kinunana a maysa a proyekto ti lokal a gobierno nga idadauluanna ti pannaka-dredge ti Mestizo River agsipud ta silted daytoyen a pagamkanna a pakalayusan dagiti bumarangay iti asideg ti karayan iti panawen ti matutudo.

Ngem suspetsa ti kampo ni Fr. Rosimo a maaramat dagiti bapor a nagpondo iti kabaybayan iti asideg ti Barangay Poro para iti black sand mining.

Alegasion ti kampo ni Rosimo a ti panagminas iti black sand ti makagapu iti pannakalayus dagiti coastal barangays.#