Footer

Motorista, dead on arrival iti ospital gapu iti pannakaikrasna

CANDON CITY – Natay daytoy a motorista gapu laeng iti panangliklikna a matsek-point dagiti polis iti sanguanan ti public market ditoy nga ili idi aldaw ti Hulio 12.

Dead on arrival ni Sammy Jimeno, Jr., y Balani, 23, ken residente iti Barangay Tamurong, Candon City, iti Candon General Hospital gapu kadagiti nakaro a dunorna iti nadumaduma a paset ti bagina, nangruna iti ulona.

Nakaro met dagiti sugat ti back rider a ni Harry Pascua y Gabatino, 22, naasawaan, ken kalugaran met laeng ni Jimeno.

Segun iti panagimbestiga dagiti polis-Candon, kinamat dagiti polis-Santiago a naglugan iti patrol car a minaneho ni PO3 William Ellorin y Cardenas, 54, ti Motoposh motorcycle a minaneho ni Jimeno gapu ta mapapati a di intaltalek ti naud-udi ti panangpasardeng kenkuana dagiti polis iti checkpoint nga impasdekda iti national highway partikular iti sanguanan ti tiendaan publiko ti ili.

Mapapati a saan a nakamatan dagiti polis da Jimeno agingga iti nakalas-udda iti Candon City ket nakikoordinarda iti polis-Candon para iti pannakatiliw dagiti dua.

Segun pay iti inbestigasion, nagbaliw ti rota a sinurot da Jimeno ket idi nakadanonda iti nagkurbaan ken nadarat a paset ti kalsada iti Barangay Balingaoan, Candon, mapapati a naguyas ti motorsiklo sana dinungpar ti concrete barrier iti akin-abagatan nga abaga ti kalsada.

Mapapati a nagpreno met ni Ellorin ngem naguyas ti patrol car ket dinungparna ti concrete barrier ken ti naiakras a motorsiklo.

Intaray dagiti polis-Santiago dagiti biktima iti Candon General Hospital ngem naideklara a natayen ni Jimeno.

Nagsagrap ti makannigid a paset ti motorsiklo iti dadael idinto a limnek ti makannigid a sungo ti bumper ti patrol car.

Naipan dagiti lugan iti police station ti Candon City ngem naruk-atan ti patrol car kalpasan a nangipresenta dagiti polis iti affidavit of undertaking.#

Comments are closed.