Footer

Pagtagilakuan, naiballaag a mabomba

VIGAN CITY – Palso ti ballaag a mabomba ti maysa a pagtagilakuan  idi aldaw ti Hulio 17.

Iti clearing operations nga insayangkat dagiti kameng ti Explosive Ordnance Disposal manipud iti Provincial Police Office, awan ti nasarakanda a bomba iti uneg ti Mike’s Department Store, a nakaawat iti ballaag manipud iti telepono a mabomba daytoy idi Hulio 17..

Teoria ti polis a maysa a frankster ti nangtelepono iti sales executive a nangiballaagaanna iti pannakabomba ti Mike’s Department Store.

Kinuna ni Vigan City OIC Police Supt. Maximo A. Taclas a pinadasda ti nakikoordinar iti PLDT para iti pannakatunton ti timmawag ngem mapapati nga insungbat ti maysa nga empleado iti nasao a telecommunications firm nga awananda iti kapabilidad a mangtunton iti timmawag.

Nabuak dagiti  empleado ken aggatgatang iti nasao a pagtagilakuan iti Quezon Avenue ditoy siudad gapu iti kaburnok dagiti polis a simrek iti Mike’s Department Store sada pinaruar amin dagiti tattao iti uneg ti pagtagilakuan agraman ti akinkukua sada nagpatulong iti EOD tapno mangisayangkatda iti clearing operations.

Immuna ngem daytoy, nagpatulong iti polis da Mary Fe Chan Po, 43, manager iti Mike’s Department Store, naasawaan, ken residente iti Barangay Casili, Sto. Domingo, Ilocos Sur ken ni Jenny Tabbilos y Nelson, 24, awanan asawa, sales executive ti nasao a pagtagilakuan, a nakaawat ti naud-udi iti maysa a tawag iti telepono manipud iti di nabigbig a tao a nagballaag iti pannakabomba ti pagtagilakuan.

“Mabomba ta Mike’s madamdama,” dayta ti kinuna ni Tabbilos nga imbalikas ti caller.

Dagus met la nga imbaba ti caller ti telepono.

Kalpasan ti clearing operations, indeklara ni SPO4 Anselmo Padre, lider ti EOD team, nga awan ti nasarakanda a bomba iti pagtagilakuan.

Nupay negatibo ti resulta ti operasion, kas precautionary measure, ninayonan ni Taclas ti bilang dagiti polis nga agbantay iti Quezon Avenue, kangrunaan iti sanguanan ti pagtagilakuan.

Agtultuloy ti inbestigasion no ania ti motibo ti caller a nagballaag a mabomba ti pagtagilakuan.

Daytoy ti umuna a gundaway nga adda ballaag iti panagbomba iti maysa a pagtagilakuan ditoy siudad kalpasan ti pannakapabettak babaen ti maysa nga eksplosibo iti Danny Boy Hardware and Auto Supply idi Mayo 20.

Nupay kinuna dagiti inbestigador nga improvised a bomba ti napabettak, sumagmamano a pagtagilakuan ti nadadael a pakaibilangan ti Foxton Trading, Shopper’s Mart, ken ABC General Merchandise.

Nupay nairekord iti CCTV dagiti naglabaslabas iti dayta a lugar sakbay ti panagbettak ti bomba, saan a nalawag ti video daytoy tapno adda pakabigbigan kadagiti suspek.

Mapapati a sakbay ti panagpabettak iti bomba iti Danny Boy Hardware and Auto Supply, nakaawat ti asawa ti akinkukua iti pagtagilakuan kadagiti death threats.

Uray ti akinkukua iti Shopper’s Mart, mapapati a nakaawat met kadagiti death threats.#

Comments are closed.