Footer

Rotating brownouts maipakat iti Luzon agingga a tumalingenngen ti suplay ti koriente: NGCP

SAN FERNANDO CITY – Nagsagrap dagiti agus-usar iti koriente iti Northern ken Central Luzon iti maysa agingga iti uppat nga oras a rotating brownout idi lawasna agsipud iti nababa a suplay iti koriente.

Kinuna ni Lilibeth Gaydowen, communications and public affairs officer for North Luzon ti National Grid Corporation of the Philippines (NGCP), a naipakat ti load dropping tapno maiyalokar dagiti adda a power tapno mapreserba ti talingenngen ti elektrisidad iti Luzon grid.

Gapu iti panangduprak ti Bagyo Glenda iti Abagatan a Luzon, adu a poste ti koriente ti natuang ken naputed ti elektrisidad kadagiti probinsia a nagdaliasatanna.

Uray iti Metro Manila, nagsagrap iti brownout ket sa la naisubli ti koriente kalpasan ti sumagmamano nga oras kalpasan a pimmanaw ti bagyo.

Naipakat ti rotating brownout kadagiti sumagmamano a paset ti Metro Manila gapu iti kinababa ti available a suplay ti koriente.

Kinuna ni Gaydowen a naipakat ti rotating brownouts iti North ken Central Luzon tapno saan a dumanon iti tukot ti suplay ti koriente nga agresulta iti sapasap a blackout iti Luzon grid.

Nangrugi a naipakat ti rotating brownout idi Biernes kadagiti distribution utilities iti Region 1, II, III ken iti Cordilleras.

Ngem iti probinsia ti Ilocos Sur, naireport nga adda dagiti ili a nagpukaw ti korienteda agingga iti siam nga oras idi Huebes.

Kinuna ni Gaydowen nga agpangato-agpababa ti energy generation ket kasapulan a pagbibingayan ti enerhia  bayat nga agtaltalinaed nga off-line dagiti planta ti elektrisidad iti Akin-abagatan a Luzon.

Saan pay a naan-anay a naisubli dagiti linia ti elektrisidad a pinuted ni Bagyo Glenda a nangtuang iti agarup 1,500 a poste iti South Luzon a nakaigapu iti saan a panagkurri dagiti sumagmamano a planta ti elektrisidad.

Kinuna ni Gaydowen a nupay naibaonen dagiti linemen ti NGCP iti akin-abagatan a paset ti Luzon tapno tumulongda a mangtarimaan kadagiti transmission lines, manamnama a santo la naan-anay a maisubli dagiti nadadael a linia agingga iti Hulio 22.

Innayonna nga agingga iti saan nga agkurri amin dagiti planta ti koriente, agtultuloy ti maipakat a brownout.

Kinuna met ni Ernest Vidal, public affairs officer ti NGCP iti Pampanga, a maipakat ti brownout manipud iti dua agingga iti uppat nga oras iti North ken Central Luzon agingga nga agbalin a normal ti suplay ti koriente.

Naipababaen ti Luzon grid iti red alert agsipud ti addaan daytoy iti 1,163 NW a depisit iti reserba.

Segun iti NGCP, idi Biernes, addaan laeng ti Luzon grid iti reserba a 4,745 MW idinto a 5,908 MW ti demanda.

Kinuna ni Vidal a kasapulan a maiyimplementar ti rotation browouts tapno mamentener ti seguridad ken kinatalingenngen ti Luzon grid.#

Comments are closed.