Footer

Uppat nga aldaw, Tallo a Rabii

Ababa a Nobela ni Salvador A. Espejo

Maika-18 a Paset

 

Insursurot ni Randolf ti panagkitana kada Marco ken ti kaduana. Nagsardeng dagiti dua iti batog ti poste ti elektrisidad sada nagsarita. Nakita ni Randolf nga intudo ni Marco ti restobar a yanna. Nagtung-ed ti lalaki sa nagpusipos ket agtu-rongen iti restobar.

Nagsubli met ni Marco iti otel kalpasan ti panangpikpikna iti abaga ti lalaki.

Medio indumog ni Randolf ti rupana idi tumadog iti laem ti restobar ti lalaki. Nupay nakaaruat iti diaket, madlaw ti baneg ti pammagina. Pana-yagen iti tayagna a lima kadapan ken pito a pulgada. Langana ti nairuam iti pinnettakan iti rupa. Nagmattider daytoy iti ridaw sa nagtalangkiaw iti uneg. Iti apagbiit, nagintek dagiti matana ken ni Randolf.

Pinakbuan ni Randolf ti basona ngem iti suli ti matana ket pinaliiwna ti lalaki. Napnek siguro daytoy iti nakitana ket immuneg iti restobar. Pinilina ti lamisaan iti makannawan ni Randolf. Manipud iti yanna, nawaya met a makita ti sum-rekan iti otel.

Naamil ni Randolf ti bibigna. Pinakbuanna manen ti basona iti beer idinto a nagdakiwas dagiti saludsod iti panunotna.  Kapkapnekanna itan a nabilin ti lalaki nga agwanawan kadagiti sumrek iti otel.

Ania ti gagara ni Marco iti Nikolai Inn? Apay a nagsubli ni Marco iti otel? Ni kadi Margret ti ur-urayenna?

Nasiputanna ti panangsenias ti lalaki iti serbidora. Nangegna ti panagorder daytoy iti serbesa. Apagapaman a timmaliaw daytoy iti yanna.

Inkeddeng ni Randolf a tumakias iti restobar. Dina maawatan no apay nga alusiisen ken madi ti agparparikna ken-kuana.

Sinitsitanna ti serbidora sa nagbayad iti ininomna. Manen, saan a nailaksid iti imatangna ti panangmatmat kenkuana ti lalaki.

Nakaanges iti nalukay idi makaruar iti restobar. Kayari-ganna ti balud a naipupok ket damona ti lumang-ab iti nadalus nga angin iti ruar ti kulongan.

Nagpadaya ni Randolf agingga iti namnamaenna a nailingeden iti imatang ti lalaki. Nagsardeng iti bassit a tienda iti asideg ti nagkurusan sa gimmatang iti maysa nga stick a sigarilio. Kasla awan aniaman a timmaliaw iti naggapuanna bayat ti panang-sindina iti sigarilio. Napnek idi saanna a nakita ti lalaki a rimmuar iti restobar.

Kinaut ni Randolf ti selponna iti bulsa ti pantalonna sana tinawagan ni Margret ket dina-magna no ayannan.

“Asidegakon,” insungbat ti balasang. “Addaka pay dita restobar?”

“Rimmuarakon. Addaak ditoy sango ti tienda iti dayaen ti otel. Urayenka ditoy. Pailabesmo ti traysikel a nagluganam.”

“Apay kadi? Urayennak laengen iti lobby. Agdigosak pay satanto rummuar a mangrabii.”

“Saankan nga agsaludsod pay. Pailabesmo ti traysikel, ok?” kinuna ni Randolf.

“Something wrong?” inamad ni Margret.

“Just do it. Ipalawagkonto no madamdama,” kinuna ni Randolf ket iniddepnan ti selpon.

Impitik ni Randolf ti sigarilio sa napan nagtakder iti panip-ngeten a paset ti kalsada. Manipud ditoy, mapasungadanna dagiti agpadaya a traysikel.

Madamdama, maysa a traysi-kel ti nagsardeng iti abayna. Nagpayapay ni Margret. Dinag-dagus ni Randolf ti immuneg iti lugan. Imbilinna iti drayber a dina iddepen ti makina ti lugan.

“Adda kadi problema?” masmasdaaw nga inamad ni Margret.

“Adda kadi gargaretmo a napanawam iti kuartom dita otel?” inamad ni Randolf.

“Daydiay la bagko a naglaon iti aruatek. Apay kadi?”

“Sige, inka alaenen ta agtsek-outka ita met laeng. Umakarta iti sabali nga otel.”

“Mabalin a damagek no apay, your Majesty?”

“Ipalawagkonto no madamda-ma, ok?”

“You’re being mysterious but I love it!” naggarikgik ni Margret.

“Urayenka ditoy,” kinuna ni Randolf. Imbilinna iti drayber a dina iddepen ti makina ti lugan.

Insursurot ni Randolf ti pa-nagkitana iti likudan ti balasang agingga a simrek iti otel. Kalpa-sanna, kasla naipigket dagiti matana iti ridaw ti restobar a naginumanna.

Inyula ti ridaw ti lalaki a kadua ni Marco. Sikakaranting daytoy a bimmallasiw iti kalsada sa immuneg iti lobby ti otel.

Nakaem ni Randolf ti bibigna. Husto ti suspetsana! Ni Margret ti ur-urayen ti lalaki a sumangpet! Dakes ti nagparikna kenkuana.

Kinaut ni Randolf ti selponna. Tinawaganna ni Margret.

Nangegna ti kiriring ti selpon  ngem awan ti sumungbat.

Impiduana a tinawagan ti balasang. Kaskasdi nga awan ti sumungbat nupay mangegna ti kiriring ti selpon.

Dimmutdot ni Randolf iti sangagasut iti petakana sana binayadan ti plete ni Margret.

“Dakdakkelto pay ti itedko no iyuraynakami iti uneg ti dies minutos,” kinunana.

“Sige, urayenkayo, Manong,” kinuna ti drayber.

Napardas dagiti addang ni Randolf a nangsurot iti kalsada agingga iti sungaban ti otel.

Nagmattider ni Randolf iti natayag ken pangraberen a mula a dina ammo ti naganna iti masikigan ti de sarming a ridaw sa nagtalangkiaw.  Nakaliad ti lalaki iti dekutson a tugaw, sumangsango iti ridaw ti elebeytor. Iti makannawanna, agbasbasa iti pagiwarnak ti dua a ganggannaet nga agassawa.

Pagammuan, limteng ti alarma iti uneg ti otel. Napa-takder ti lalaki agraman dagiti agassawa a ganggannaet. Uram! Adda uram iti otel!

Ni Margret! simmiplot iti panunotna.

Sumrek koman ni Randolf iti otel ngem napasarimadeng ta iti pangadaywen a laud, um-umsiag ti sirena ti firetruck. Nagalingag ni Randolf. Umas-asideg ti sirena, agturong iti yanda.

Nakitana laengen ti lalaki a rimmuar iti lobby. Napardas ti addang daytoy a bimmallasiw iti kalsada, nagpaamianan agingga iti inalun-on dagiti kabalba-layan.

Nakitana ni Margret a nanglasat iti lobby. Dagus nga inasitgan ni Ronald.

“Quick! Let’s go!” kinunana ket ginuyodnan ni Randolf a rimmuar iti kalsada.

Nagsardeng metten iti dayta a kanito ti firetruck ket dimsaag dagiti bumbero sada immuneg iti otel.

Pinayapayan ni Randolf ti traysikel a dagus met a nag-buelta a nangsabat kadakuada.

“Iti Carylle Hotel,” kinuna ni Margret.

“Apay, ania ti napasamak?” inamad ni Randolf idi agtar-tarayen ti traysikel.

“Diak ammo, kellaat lattan a naguni ti fire alarm. Ngem ti masiertok, adda simrek iti kuartok ket tinakawda ti bagko!” kinuna ni Margret.

(Adda tuloyna)