Footer

2 nakimat, 1 natay

SAN JUAN, Ilocos Sur – Dua a lalaki ti nakimat sadiay Barangay Baliw ditoy nga ili idi agarup 5:20 ti malem ti Hulio 20 a nakatayan ti maysa.

Nabigbig dagiti biktima a da Troy Peneyra y Sotoza, 23, baro, ken ni Janley Argel y Peneyra, 27, naasawaan, agpada a residente iti nadakamat a barangay.

Segun iti report, adda dagiti dua iti dalanda nga aggawid manipud iti kataltalonan idi kellaat a nagkimat ket mapapati a naipalladaw ni Peneyra idinto a naarinuknok ni Argel iti daga.

Naitarayda iti Pira Clinic and Hospital iti Cabugao ngem indeklara ti nangtaming kenkuana a doktor a natayen ni Peneyra.

Iti pannakaisurat daytoy, rimmuaren iti ospital ni Argel nupay sakitsakitenna pay ti ulona.#